हेटौंडा — पक्की पुलको अभावमा वर्षायाममा मोटरसाइकल बोकेर वारपार गर्नुपर्ने लोथर खोलामा हिउँद लागेपछि स्थानीयवासीले काठेपुल हालेका छन् । खरखण्डे मागिनी टोल विकास संस्था, सिलिङे सामुदायिक वन र स्थानीय युवाको सामूहिक प्रयासपछि काठेपुल बनाउन सम्भव भएको हो ।

हिउँद महिना लागे पनि अटो, मोटरसाइकल र पैदलयात्री खोलामा जोखिम मोलेर हिँड्नु पर्ने भएकाले एक साता लगाएर काठे पुल बनाएको स्थानीय रावन चेपाङले बताए । मंगलबारदेखि काठेपुलबाट पैदलयात्री, मोटरसाइकल र अटोहरू सहज ढंगले आउजाउ गर्न थालेका छन् ।

राप्ति नगरपालिका—११ स्थित थालकटारमा रहेको माविमा खरखण्डे र सिलिङेका तल्ला भेगका विद्यँर्थी हिउँदमा पनि लोथर खोला तरेर पढ्न आउजाउ गर्नुपर्ने वाध्यता थियो । काठेपुल बनेपछि स्कुल आउजाउ गर्न सहज भएको छ । वर्षायाममा बस्ती र स्कुलभन्दा निकै टाढा बनेको झोलुङ्गे पुलबाट आउजाउ गर्नु पर्थ्यो, अहिले खोलामा काठेपुल बनेपछि विद्यार्थीलाई पनि सहज भएको सिलिङे सामुदायिक वन उपभोक्ता समितिका अध्यक्ष कृष्णबहादुर मोक्तानले बताए ।