मकवानपुर — बागमती प्रदेश सरकारले यातायात क्षेत्रको पुनरावलोकन र सुधारका लागि उच्चस्तरीय समिति गठन गर्ने निर्णय गरेको छ ।

शुक्रबारको मन्त्रिपरिषद् बैठकले श्रम, रोजगार तथा यातायात मन्त्रालयको प्रस्तावमा बागमती प्रदेश यातायात क्षेत्र पुनरावलोकन तथा सुधार उच्चस्तरीय समिति कार्य क्षेत्रगत शर्त स्वीकृति एवम् समिति गठन गर्ने निर्णय गरेको हो ।

प्रदेशको यातायात क्षेत्रमा व्यापक समस्या देखिएपछि त्यसलाई सुधार गर्न मुख्यमन्त्री इन्द्रबहादुर बानियाँको अग्रसरतामा समिति गठन गरिएको हो । ‘यातायात क्षेत्र हाम्रो प्रदेशको सबैभन्दा बढी राजस्व आम्दानी हुने क्षेत्र हो । देशभरको करिब ६० प्रतिशत सवारी यस प्रदेशमा रहेका छन् । त्यसलाई व्यवस्थित गर्न हामीले उच्चस्तरीय समिति बनाउने भएका हौं । समितिको प्रतिवेदनका आधारमा हामी अगाडि बढ्नेछौं ।’