दुईतर्फी सञ्चालनका लागि अहिले तीन वटा डोजर प्रयोग गरेर पहिरो पन्छाउने काम भइरहेको जिल्ला प्रहरी कार्यालय मकवानपुरले जनाएको छ ।
हेटौंडा — तीन दिनदेखि पहिरोका कारण अवरुद्ध रहेको कान्ति लोकपथ सोमबार साढे तीन बजेदेखि एकतर्फी सञ्चालनमा आएको छ । कान्ति लोकपथअन्तर्गत पर्ने बकैया गाउँपालिका—११ घट्टेपाखाको पहिरो पन्छाएपछि एकतर्फी सञ्चालनमा आएको हो ।
दुईतर्फी सञ्चालनका लागि अहिले तीन वटा डोजर प्रयोग गरेर पहिरो पन्छाउने काम भइरहेको जिल्ला प्रहरी कार्यालय मकवानपुरले जनाएको छ ।
यो पहिरो पन्छाएपछि कान्ति लोकपथ पूर्ण रूपमा सञ्चालनमा आउने छ । कान्ति लोकपथअन्तर्गत पर्ने ठिंगनदेखि वगुवासम्मको सडकमा खसेको तीन वटा ठूलो पहिरो पन्छाउने काम भइसकेको छ ।
कान्ति लोकपथ सञ्चालनमा आएपछि हेटौंडाबाट काठमाडौं प्रवेश गर्ने चार वटै सडक मार्ग सञ्चालन आउने छन् । यसअघि तीन वटा सडक मार्ग सञ्चालनमा आइसकेका छन् । कान्ति लोकपथ शनिबार बिहानदेखि बन्द भएको थियो ।
