चितवन प्रहरी कार्यालयका प्रवक्ता डिएसपी रवीन्द्र खनालले अदालतबाट चोरी र लुटपाट गरी लगेका सामानसहित भरतपुर महानगरपालिका-१० हाकिम चोकमा रहेको डेराबाट युवक पक्राउ परेको बताए ।
चितवन — भदौ २४ मा प्रदर्शनकारीहरूले चितवन जिल्ला अदालतमा आगो लगाउँदा महत्त्वपूर्ण अभिलेखहरू जलेर नष्ट भए । आगजनीपछि चोरीसमेत भयो । सोमबार चितवन प्रहरीले भरतपुरमा डेरा गरेर बस्ने युवकलाई पक्राउ गर्नुका साथै उनको कोठाबाट अदालतबाट हराएका सामानहरू पनि बरामद गरेको छ ।
चितवनको राप्ती नगरपालिका-६ घर भएका १९ वर्षका युवकको भरतपुर महानगरपालिका-१० हाकिम चोकमा रहेको डेराबाट सात थान मोबाइल सेट, काँसको थाल तीन सेट, एउटा टी टेबल, चार सय सिक्का पैसा, साना, ठूला गरेर तामाका ११ वटा कलश बरामद भएको छ ।
चितवन प्रहरी कार्यालयका प्रवक्ता डिएसपी रवीन्द्र खनालले अदालतबाट चोरी र लुटपाट गरी लगेका सामानसहित युवक पक्राउ परेको बताए । उनको डेराबाट कम्प्युटर टेबल एउटा, लागूआैषध ट्रामाडोलकाे चार हजार ९५० क्याप्सुल, चार वटा खुकुरी, दुई वटा हम्मर, तीनवटा स्टिल थाल र १५ वटा ग्लास पनि बरामद भएको छ ।
डिएसपी खनालका अनुसार आठ थान घडी र एउटा गितार पनि ती युवकको डेराबाट बरामद भएको छ ।
अदालतका सूचना अधिकारी अमृत विश्वकर्माले अदालतमा आगजनी गरेर महत्त्वपूर्ण अभिलेख र फाइलहरू नष्ट गर्नुका साथै चोरी पनि भएको बताएका थिए । जसमा कम्प्युटरका हार्ड डिक्सदेखि लागूआैषधका स्याम्पलहरूसमेत थिए ।
