भरतपुरको आन्तरिक सडकमा राति कार रूखमा ठोक्किँदा गम्भीर घाइते भएका भट्टको उपचारका क्रममा मृत्यु भएको प्रहरीको भनाइ।
चितवन — शुक्रबार राति भरतपुरमा एक कार अनियन्त्रित हुँदै सडकको आडमा रहेकोको रुखमा ठोक्किँदा एक जनाको मृत्यु भएको छ ।
चितवन जिल्ला प्रहरी कार्यालयले दुर्घटनामा गम्भीर घाइते भएका भरतपुर महानगरपालिका वडा नम्बर २ आँपटारीका विप्लब भट्टको उपचारका क्रममा मृत्यु भएको जानकारी दिएको छ ।
भट्टले चलाएको बा १५ च ४६९३ नम्बरको कार राति साढे एक बजेतिर रूखमा ठोक्किएको थियो । जिल्ला प्रहरी कार्यालयका प्रहरी निरीक्षक लक्ष्मण केसीले बताए । भरतपुर महानगरपालिका-१० रमाइलो चोकबाट बाइपास सडक आडको विशालचोक निस्कने भित्री सडकमा उक्त दुर्घटना भएको उनले बताए ।
प्रारम्भिक अनुशन्धानअनुसार कार आफैं अनियन्त्रित भएर रूखमा ठोक्किएको प्रहरी निरीक्षक केसीको भनाइ छ । गम्भीर घाइते भट्टलाई उपचारका लागि पुरानो मेडिकल कलेज भनिने सिएमएसको भरतपुरमा रहेको शिक्षण अस्पताल लगिएको थियो ।
