बागमती प्रदेश प्रहरी कार्यालयको आयोजना र हेटौंडा सामुदायिक आँखा अस्पतालको प्राविधिक सहयोगमा १ सय ६० जना प्रहरी कर्मचारीहरुको आँखा जाँच गरिएको हो ।
हेटौंडा — बागमती प्रदेश प्रहरी कार्यालय, हेटौंडास्थित प्रहरीहरुको शुक्रबार आँखाको परीक्षण गरिएको छ ।
बागमती प्रदेश प्रहरी कार्यालयको आयोजना र हेटौंडा सामुदायिक आँखा अस्पतालको प्राविधिक सहयोगमा १ सय ६० जना प्रहरी कर्मचारीहरुको आँखा जाँच गरिएको हो । जाँच गरिएकाहरुमध्ये २० जनाको आँखाको थप उपचारका लागि हेटौंडा सामुदायिक आँखा अस्पतालमा जान सल्लाह दिइएको छ । कार्यक्रममा आँखा जाँचपश्चात् आवश्यक औषधिहरु पनि नि:शुल्क वितरण गरिएको हेटौंडा सामुदायिक आँखा अस्पतालका वरिष्ठ प्रशासक सुधिर श्रेष्ठले बताए ।
हेटौंडा सामुदायिक आँखा अस्पतालले नियमित रुपमा सामुदायिक कार्यक्रमअन्तर्गत अस्पताल आउन नसक्ने बिरामीहरुका लागि विभिन्न स्थानमा पुगेर आँखा जाँच कार्यक्रम गर्दै आएको छ । विद्यालयमा पुगेर विद्यार्थीहरुको आँखा जाँच र कार्यस्थलमा पुगेर कामदार कर्मचारीहरुको आँखा जाँच गर्दै आएको छ ।
