बेंग्लोरका ट्रक चालक मेगुप्रसाद गम्भीर घाइते, अन्य दुईको अवस्था सामान्य छ, भरतपुर अस्पतालमा उपचार जारी।
चितवन — नारायणगढ-मुग्लिन सडकको मुग्लिननजिक तुइनखोलाामा बिहीबार दिउँसो सडकमाथिबाट खसेको ढुंगाले लागेर भारतीय नम्बर प्लेटको ट्रकमा क्षति पुगेको छ । चितवन प्रहरीले ट्रकका चालक गम्भीर घाइते भएको जानकारी दिएको छ ।
साउन ४ गते पनि ढुंगा खसेर भारतीय नम्बरको कारमा क्षति पुग्नुका साथै कारमा रहेका तीन जना भारतीय घाइते भएका थिए । चितवन प्रहरीले दिएको जानकारीअनुसार केए–४३६८५६ नम्बरको ट्रकमा ढुंगा खसेको थियो ।
ढुंगाले टाउकोमा लागेका ट्रक चालक भारत बेंग्लोरका ४०/४५ वर्षीय मेगुप्रसादको अवस्था गम्भीर रहेको चितवन प्रहरीका प्रवक्ता डीएसपी रवीन्द्र खनालले बताए ।
ट्रकमा रहेका सयद अफिद र नहमान धुनियाँको अवस्था सामान्य रहेको छ । घाइते तीन जनाको भरतपुरको सरकारी अस्पतालमा उपचार भइरहेको छ । ट्रकमा प्लाइउड रहेको डीएसपी खनालले बताए ।
