हेटौंडा — गाउँपालिकाको कार्यहरुलाई एउटै भवनवाट व्यवस्थित ढंगले काम सञ्चालन गर्नका लागि मकवानपुरको उत्तरी क्षेत्रमा पर्ने एक पालिकाको कार्यालय भवनको निर्माण कार्य अन्तिम चरणमा पुगेको छ ।

जिल्लाकै जनसंख्या र क्षेत्रफलको हिसाबले सबैभन्दा सानो ईन्द्रसरोवर गाउँपालिकाको प्रशासनिक भवनको निर्माण कार्य ८० प्रतिशत भन्दा बढी सकिसकेको छ । ईन्द्रसरोवर  गाउँपालिकाको केन्द्र रहेको खानीखेतमा ५ तले ३६ कोठे भवन निर्माणाधीन अवस्थामा छ ।

२०७८ कात्तिकमा सम्झौता गरी निर्माण कार्य सुरु गरिएको थियो । सम्झौता अनुसार ०८२ चैत मसान्तसम्म निर्माण कार्य सकिसक्नु पर्ने छ । उमा–मनकामना आरवी जेभी निर्माण कम्पनीले निर्माण कार्यको ठेक्का लिएको छ ।

‘खानीखेतको डाँडा खारेर भवन वनाउन समय लागेकाले सम्झौता भएकै समयमा काम सम्पन्न गर्न अलि कठिन देखिन्छ,’ पालिकाका ईन्जिनियर राजेन्द्रसिंह ठगुन्नाले  भने, ‘अहिले काम भइरहेको छ ।’ 

करिब चार रोपनी जग्गामा १० करोड ७४ लाखको लागतमा उक्त कार्यालय भवन बनिरहेको छ । ‘उक्त भवन तयार भएपछि पालिकाको कार्यालय र शाखाहरु सबै एउटै छानामुनि हुनेछ’, पालिकाका अध्यक्ष डिके पुडासैनीले भने, ‘यो पालिकाको सिंहदरबार नै हो ।’