रामेछाप — रामेछापको उमाकुण्ड गाउँपालिका–४ स्थित चण्डेश्वरी माध्यमिक विद्यालयको १८ कोठे नयाँ भवन पाँच वर्षदेखि अलपत्र बनेको छ । स्थानीयका अनुसार एसियाली विकास बैंक (एडीबी) को लगानीमा २०७८ सालमा निर्माण सुरु भएको उक्त भवन अझै निर्माण सम्पन्न हुन सकेको छैन ।

भवनको मुख्य ठेकदार हिमाल अधिकारी हुन् । निर्माण कम्पनीले लामो समयदेखि काम रोकेर राख्दा भवन अलपत्र बनेको र संरचना पनि जीर्ण बन्दै गएको स्थानीय गणेश श्रेष्ठले बताए । 'एडीबीका एकजना इन्जिनियरले त उल्टै हामीलाई ९ करोडको काम ५ करोडमा ठेक्का लिएपछि समयमा कसरी सकिन्छ ? भन्ने प्रश्न गरेका थिए,' श्रेष्ठले भने ।

निर्माण व्यवसायीलाई भेट्न गाउँपालिका अध्यक्षसहित काठमाडौंसम्म धाउनुपरेको वडाध्यक्ष एवं विद्यालय व्यवस्थापन समितिका अध्यक्ष मानबहादुर सुनुवारले गुनासो गरे । 'हामीले काठमाडौं गएर काम छिटो गर्न आग्रह गर्‍यौँ । त्यस बेला काम गर्छौं भने । तर उनीहरूले काम गरेनन्,' उनले भने । भवन निर्माणको प्रगति कति भयो, कहिलेसम्म सकिन्छ भन्नेबारे अहिलेसम्म कुनै स्पष्ट जानकारी नभएको अध्यक्ष सुनुवारले बताए ।