प्रारम्भिक क्षतिमा सम्बन्धित निकायले समयमै ध्यान नदिँदा अहिलेको अवस्था आएको स्थानीयहरूको गुनासो छ ।
What you should know
रामेछाप — सदरमुकाम मन्थलीलाई खाँडादेवी, दोरम्बा शैलुङ र सुनापति गाउँपालिकासँग जोड्ने मुख्य सडक खण्ड शनिबार बिहानदेखि ठूला सवारीसाधनका लागि पूर्ण रूपमा अवरुद्ध भएको छ ।
स्थानीय भटौली खोलामा आएको बाढीले पक्की पुलमा क्षति पुगेपछि साना सवारीबाहेक सबै ढुवानीका सवारी साधन रोकिएका हुन् ।
मन्थली नगरपालिका–७ र खाँडादेवी गाउँपालिका–४ को सिमानामा पर्ने पुलमा बाढीले खाँडादेवीपट्टिको पिलर पछाडिको भागमा कटान गर्दै बगाएको छ । स्थानीय केदारकुमार सार्कीका अनुसार, बाढीले पुलको पिलरमा असर पुर्याएपछि संरचनाको जोखिम झनै बढेको छ ।
‘गत वर्ष असोजमा पनि खोलाले यही पिलरमा ठक्कर दिएको थियो, तर यस पटकको बाढीले पूरै क्षति गर्यो,’ उनले भने । प्रारम्भिक क्षतिमा सम्बन्धित निकायले समयमै ध्यान नदिँदा अहिलेको अवस्था आएको स्थानीयहरूको गुनासो छ ।
गतवर्ष असोजमा सुनकोशी नदीमा आएको बाढीले मन्थली–सिन्धुली सडकको खुर्कोट पुल बगाएपछि त्यहाँ वैकल्पिक रूपमा बेलिब्रिज जडान गरिएको थियो । तर उक्त बेलिब्रिजबाट १५ टन बढी तौलका गाडी सञ्चालनमा रोक लगाइएको छ । त्यसपछि सबैभन्दा भरपर्दो विकल्पका रूपमा सित्खा हुँदै भटौली पुलको बाटो प्रयोग हुँदै आएको थियो ।
सिन्धुलीका चालक सिर्जन तामाङका अनुसार, सुनकोशी–मरिन डाइभर्सन आयोजनाका लागि वीरगन्जबाट सामग्री बोकेर आएका करिब एक दर्जन गाडी खाँडादेवी गाउँपालिका–४ मै रोकिएका छन् । ‘खाली गाडी त खुर्कोटबाट जान दिन्छन्, तर लोड गाडीले बाटो पाउँदैन । घुमेर आउँदा यहाँ पनि पुलमै समस्या भएपछि रोकिनुपर्यो,’ उनले भने ।
पुल मर्मतको काम तीव्र रूपमा भइरहेको पूर्वाधार विकास कार्यालय रामेछापका प्रमुख ज्यानेन्द्र प्रसाद पुनले जानकारी दिए । ‘पहिला पनि केही क्षति थियो, मर्मतको क्रममा बाढी आयो । माथिबाट पहिरो झरिरहेकाले कठिनाइ भए पनि पाँच वटा मेशिन प्रयोग गरेर काम अघि बढाइएको छ,’ उनले भने, ‘अबको दुई दिनभित्र पुल सञ्चालनमा ल्याउने लक्ष्य छ ।’
भटौली खोलामा रहेको ४० मिटर लामो उक्त पक्की पुल आर्थिक वर्ष २०७१/०७२ मा स्विस सरकारको सहयोगमा सञ्चालन भएको स्थानीय सडक पुल कार्यक्रम अन्तर्गत स्वच्छन्द सिर्जना जेभीले करिब ४ करोड रुपैयाँ लागतमा निर्माण गरेको थियो । वैकल्पिक सडक सञ्जालमा पर्ने यो पुल रामेछापका लागि रणनीतिक रूपमा अत्यन्तै महत्त्वपूर्ण मानिन्छ ।
