दोलखा — बाढीले कालिञ्चोक गाउँपालिका–१ कालिञ्चोकको सडक बगाएपछि दुई सातादेखि सम्पर्क विच्छेद भएको छ ।

बर्खामा यातायात सञ्चालनसहित स्थानीयलाई आउजाउ गर्न सहजताका लागि यावल खोलामा राखिएको ह्युमपाइप दुई साताअघि बाढीले बगाएपछि पूरै वडा सडक सञ्जालबाट बिच्छेदमा परेको हो ।

बाढीले यावल खोलाको ह्युमपाइप बगाएपछि यातायात पूर्ण ठप्प भएको छ । बालबालिका बर्खाको भेलमा खोलामा हेलिएर विद्यालय जान बाध्य छन् । सडक बगाएपछि गाउँमा खाद्यान्न ढुवानी ठप्प भएको छ । बिरामीलाई अस्पताल लैजान डोकोमा बोकाएर खोलामा हेलिएर लानुपर्ने बाध्यता भएको कालिञ्चोक–१ का वडाध्यक्ष पदम थामीले बताए । पानी परेका दिन विद्यालय पुगेका बालबालिका लिन अभिभावकले यावल खोलामा हेलिएर वारपार गराउने गरेको बताए ।

वैकल्पिक मार्गका रुपमा रहेको बिगु हुँदै जाने सडकमा समेत पुल नभएपछि बर्खामा खोला तर्न नसकिने हुँदा झन् समस्या भएको उनले बताए । ‘वडालाई सडक सञ्जालसँग जोड्ने मुख्य सडक नै यहीँ हो,’ उनले भने, ‘बर्खामा आउजाउ गर्न राखेको ह्युमपाइप पनि बगायो, खोला तर्न निकै कठिन छ, आउजाउ गर्न सकेका छैनौं ।’ यावल खोलामा भएको झोलुङ्गे पुल भूकम्पमा क्षतिग्रस्त बनेपछि सडक खनेर त्यसलाई विस्थापन गरिएको उनले बताए ।