काभ्रे — काभ्रेमा मोटरसाइकल दुर्घटना हुँदा एकजनाको मृत्यु भएको छ भने दुईजना घाइते भएका छन् ।
शनिबार बिहान १०ः१० बजेको समयमा पनौती नगरपालिका-३ बगुवास्थित कुशादेवीबाट आशापुरी मन्दिर जाँदै गरेको बा ६२ प ६६१० नम्बरको मोटरसाइकल अनियन्त्रित भई सडकबाट खस्दा दुर्घटना भएको हो ।
दुर्घटनामा मोटरसाइकलमा पछाडि सवार ३२ वर्षीया सुजना खत्रीको मृत्यु भएको जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक मीनबहादुर घलेले बताए । शिर मेमोरियल अस्पतालमा उपचारका क्रममा उनको मृत्यु भएको हो । शव पोष्टमार्टमका लागि धुलिखेल अस्पताल पठाइएको छ ।
दुर्घटनामा मृतकका श्रीमान् मोटरसाइकल चालक पनौती-५ बस्ने ३२ वर्षीय विजय थापा र ५ वर्षीय छोरा बिएन्स थापा घाइते भएका छन् । उनीहरुको बनेपास्थित शिर मेमोरियल अस्पतालमा उपचार भइरहेको उनले जानकारी दिए ।
