नेपालको संविधान २०७२ र अनिवार्य तथा निःशुल्क शिक्षा सम्बन्धी ऐन २०७५ मा भएको व्यवस्था बमोजिम ४ वर्षदेखि १३ वर्षसम्मका विद्यालय उमेर समूहका बालबालिकाहरूलाई विद्यालयमा भर्ना गराई काभ्रेको बेथानचोक गाउँपालिका, खानीखोला गाउँपालिका, महाभारत गाउँपालिका, रोशी गाउँपालिका र पनौती नगरपालिका अनिवार्य तथा निःशुल्क शिक्षा लागू स्थानीय तह घोषणा भएका छन् ।

सो अवसरमा भुम्लु गाउँपालिकाले माध्यमिक शिक्षा परीक्षा ( एस.ई.ई) २०८१  मा उत्कृष्ट अंक ल्याउने २ जना विद्यार्थीलाई जनही १ लाख रुपैयाँले पुरस्कृत गरेको छ । गाउँपालिकाभित्रका विद्यालयहरूबाट सबैभन्दा उत्कृष्ट अंक ल्याउने छात्रा र छात्रलाई गाउँपालिकाले नगदसहित सम्मान गरेको हो ।

छात्रातर्फ वडा नं १, सापिङको रिठ्ठेस्थित सेतीदेवी माध्यमिक विद्यालयका प्रशन गिरीले ३ दशमलव ७४ सीजीपीए प्राप्त गरी उत्कृष्ट भएका थिए  । अरुणोदय माध्यमिक विद्यालय, भुम्लु गाउँपालिका वडा नं २, सिमथलीका मनिता खड्काले ३ दशमलव ४४  सीजीपीए ल्याएर छात्रातर्फ उत्कृष्ट भएकी थिइन्।

उनीहरूलाई जनही १ लाख रुपैयाँसहित सम्मान गरिएको हो। त्यस्तै, धेरै विद्यार्थी उत्तीर्ण गराउन सफल ३ विद्यालयलाई पनि नगद २५ हजारसहित सम्मान गरिएको छ । वडा नं ६ को जनता माध्यमिक विद्यालय, वडा नं १ को सेतीदेवी माध्यमिक विद्यालय र वडा नं ७ को शारदा माध्यमिक विद्यालयलाई पुरस्कृत गरिएको हो ।