बालकुमारी माविमा २०३९ सालमा कक्षा १० मा अध्ययन गरेका विद्यार्थीले २०७६ सालमा स्थापना गरेको बालमाविद् समूहले अभिभावक सम्झिएको हो
चितवन — बटुकलाल श्रेष्ठको उमेर अब सय वर्ष नाघ्न अब धेरै दिन छैन । १९८२ साउन ११ मा जन्मेका बटुकलाल पुर्ख्यौली थलो तनहुँ बन्दीपुरबाट २०२८ सालमा चितवन झरेका हुन् ।
नारायणगढ क्षेत्रपुरमा बस्दै आएका बटुकलाल शनिबार चितवन उद्योग वाणिज्य संघको नारायणगढमा रहेको सभा हलमा आयोजित कार्यक्रममा सम्मानित भए । उनका साइँला छोरा शैलेन्द्रका साथी समूहबाट उनी सम्मानित भएका हुन् ।
नारायणगढको बालकुमारी माध्यमिक विद्यालयको ख्याति कुनै बेला नेपालभर थियो । हाल एसईई भनिने तत्कालीन एसएलसी परीक्षामा एकपटक पहिलो र दुईपटक नेपालका उत्कृष्ट १० भित्र नतिजा ल्याउने बालकुमारी स्कुलमा शैलेन्द्र पनि पढ्थे । २०३९ सालमा कक्षा १० मा पढ्ने विद्यार्थीको समूहले शैलेन्द्रका पिता बटुकलालसहित २५ जनालाई सम्मानित गरेको हो ।
सो वर्षका विद्यार्थीले बालमाविद् २०३९ समूह गठन गरेका छन् । ‘त्यो बेला कक्षा १० पढ्ने हामी ८० जना रहेछौं । हामी सम्पर्कमा रहनका लागि २०७६ साल पुसमा समूह बनाएका हौं,’ समूहका उपाध्यक्ष रहेका लक्ष्मण बानियाँले भने । त्यो समूहका साथीहरुका बाआमाका लागि सम्मान कार्यक्रम गर्ने योजनालाई शनिबार मूर्तरुप दिएको उनले बताए । साथीहरुमध्ये ४० जना मात्रैको बाआमा वा आमा बामध्ये एक जीवित रहेछन् ।
‘हामीले सबलाई निमन्त्रण गरेका थियौं । अरुलाई आउन सम्भव भएन । कोही कता, कोही कता बस्नुहुन्छ । चितवनमै बस्ने र टाढा भए पनि आउन अनुकूल परेका २५ जना साथीका बाआमा आज आउनुभयो,’ उपाध्यक्ष बानियाँले भने ।
‘बालबालिकाको शिक्षाको पहिलो पाठशाला घर हो र बाआमा पहिलो शिक्षक हुन् । त्यसैले हामीले हाम्रा अभिभावकका लागि सम्मान कार्यक्रम राखेका हौं,’ समूहका अध्यक्ष बद्री खनालले भने । सन्तानको शिक्षाका लागि बाबुआमाले ठूलो मेहनत गर्ने हुँदा त्यसको गुन तिर्न पनि वृद्धवृद्धा अवस्थामा रहेका बाबुआमाका लागि ‘अभिभावक सम्मान’ कार्यक्रम गर्ने सोच जन्मेको अध्यक्ष खनालले बताए ।
२०२२ सालमा स्थापना भएर २०३२ सालदेखि बालकुमारी माविका विद्यार्थीले एसएसली परीक्षा दिन सुरु गरेका थिए । बालकुमारी माविका विद्यार्थी सुनिल रत्नकंसाकार २०३२ सालको एसएलसी परीक्षाको नतिजामा नेपालभर पहिलो भएका थिए । २०३३ सालमा चौथो र २०३४ सालमा दोस्रो स्थानमा आएको विद्यालय प्रशासनले जनाएको छ ।
