चितवन — शुक्लाफाँटाबाट स्थानान्तरण गरेर चितवन निकुञ्जको पूर्वी क्षेत्रमा छाडिएकामध्ये एक बाह्रसिंगा लामो समयको अन्तरालपछि पुन: देखा परेको छ । २०७४ सालको वैशाखमा शुक्लाफाँटाबाट ल्याइएका सात बाह्रसिंगा सोही वर्षको बर्खामा आएको बाढीपछि केही मरेका थिए भने एउटाको अवस्था अज्ञात थियो । 

सरकारले २०७३ सालको हिउँदमा कोशीबाट अर्ना ल्याएर चितवन निकुञ्जभित्र रहेको पुरानो बस्ती बाहिर सारेपछि खाली भएको पदमपुरमा तारबार गरेर राखेको थियो । सोही तारबारभित्र अर्नासँगै बाह्रसिंगा पनि राखिएका थिए । पाँच पोथी र दुई भाले बाह्रसिंगामध्ये दुई पोथी ल्याउने बित्तिकै मरेका थिए । अन्य चार पनि विभिन्न कारणले मरेका थिए । अर्ना रहेको खोरमा बाढी पसेर क्षति पुगेपछि रोग र बाघले आक्रमण गर्दा अर्ना पनि सबै मरेर सकिएका छन् । एउटा बाह्रसिंगाको अवस्था यकिन हुन सकेको थिएन ।