हेटौंडा — मकवानपुरको बकैया गाउँपालिकाका एक स्थानीयको गोरेटो बाटोबाट लडेर मृत्यु भएको छ ।
बकैया गाउँपालिका—३ जलजलेका ४७ वर्षीय वरुण लामिछाने घरबाट गाई गोठतर्फ जाने क्रममा गोरेटो बाटोबाट लडेर उनको मृत्यु भएको हो । सानो गोरेटोबाट करिब ५ मिटर तल बाँसको झ्याङमा खसेर उनको मृत्यु भएका हात्तीसुँडे प्रहरी चौकीका प्रहरी नायब निरीक्षक जनक तामाङले बताए ।
लामिछानेको घरबाट गोठ करिब तीन सय मिटरको दुरीमा छ । उनको घटनास्थलमा नै मृत्यु भएको जिल्ला प्रहरी कार्यालय मकवानपुरमा प्रहरी नायब उपरीक्षक एव प्रवक्ता श्यामु अर्यालले बताए । जिल्ला प्रहरी कार्यालय मकवानपुरको तथ्यांक अनुसार मकवानपुरमा चालु आवको ११ महिनाकोबीचमा भीरबाट लडेर यो घटनासहित १८ जनाको मृत्यु भइसकेको छ । यसै अवधिमा मकवानपुरमा भीरबाट लडेर २३ जना घाइते भएका छन् ।
