चितवन — सिमान्तकृत वर्गमा पर्ने नेपालकाे आदिवासी चेपाङ जातिको समुदायकाे संस्था नेपाल चेपाङ संघकाे बागमती प्रदेश अध्यक्षमा खुसीलाल चेपाङ नै दाेहोरिएका छन् । संघकाे भरतपुरमा सुरू भएकाे दाेस्राे प्रदेश अधिवेशन साेमबार साँझ नयाँ कार्य समिति चयन गर्दै सकिएकाे छ । नवगठित कार्य समितिकाे उपाध्यक्षमा सिगलाल चेपाङ र सचिवमा अर्जुन चेपाङ रहेका छन् ।
त्यसैगरी काेषाध्यक्षमा उद्धव चेपाङ, सह-सचिवमा राजकुमार चेपाङ चयन भए । कार्य समितिकाे सदस्यहरूमा दिनेश चेपाङ, दिवन चेपाङ, सन्तबहादुर चेपाङ, अस्मिता चेपाङ, मनिका चेपाङ, देवीमाया चेपाङ, मानबहादुर चेपाङ, इनाेज चेपाङ, अञ्चल चेपाङ, विष्णुलाल चेपाङ र नमुना चेपाङ रहेका छन् । प्रदेश अधिवेशनकाे नेपाल चेपाङ संघका केन्द्रीय अध्यक्ष तथा संविधान सभा सदस्य गाेविन्दराम चेपाङले उद्घाटन गरेका थिए ।
बागमती प्रदेशकाे चितवन, मकवानपुर र धादिङमा चेपाङ जातिकाे बाक्लाे बसाेबास छ । त्यसैगरी चितवनसँग नजिक रहेकाे गण्डकी प्रदेशकाे गाेरखा जिल्लामा पनि चेपाङ रहेका छन् । चेपाङ समुदाय प्रायजसाे विकट पहाडी भेगमा बसेबास गरेका छन् । नेपाल चेपाङ संघका अनुसार चेपाङ समुदायकाे कुल जनसंख्या ८४ हजार ३६४ छ । चेपाङ बसाेबास क्षेत्रमा हालसम्म पनि बाटाे, बिजुली, राम्राे विद्यालय र स्वास्थ्य निकायजस्ता आधारभूत पूर्वाधारहरूकाे अभाव रहेकाे केन्द्रीय अध्यक्ष गाेविन्दराम चेपाङ बताउँछन् ।
विकासमा पछाडि पारिएकाे अल्पसंख्यक समुदाय भएका कारण चेपाङ जातिकाे उत्थानका लागि संविधानमा व्यवस्था भए बमाेजिम संरक्षित क्षेत्र ताेक्न माग गर्दै आएकाे केन्द्रीय अध्यक्ष गाेविन्दराम चेपाङकाे भनाइ छ । यसका साथै चेपाङका लागि राज्यले याे जातिकाे परम्परा र उद्यमसँग जाेडिएकाे चिउरीकाे रूख र चमेरा संरक्षणजस्ता अभियानका सााथै समय सान्दर्भिक अन्य योजना, कार्यक्रम र बजेट ल्याउनुपर्ने पनि उनले बताए ।
