मकवानपुर — मकवानपुर प्रहरीले हेटौंडाको दुई छुट्टाछुट्टै स्थानबाट विभिन्न परिमाणको अवैध लागुऔषधसहित ६ जनालाई पक्राउ गरेको छ । पक्राउ परेकामध्ये एकजना लागुऔषध कारोबारीसमेत रहेका छन् ।

प्रहरी चौकी पदमपोखरीको टोलीले हेटौंडा–१३ बाट २५ वर्षीय अजित दोङ र २१ वर्षीय विनय लामाको साथबाट २५ क्याप्सुल लागुऔषध ट्रामाडोल फेला पारेको थियो । उनीहरुसँग सोधपुछ गर्ने क्रममा हेटौंडा–२ मानसचोकमा रहेको नेपाली चुलो होटलकी सञ्चालकसँग ट्रामाडोल खरिद गरेर ल्याएको बताएपछि प्रहरीले होटलमा छापा मारेको थियो । 

होटल सञ्चालक मकवानपुरको बागमती गाउँपालिका– ४ की सरिता माझीसहित सोही ठाउँका २२ वर्षीय उदेश राई र हेटौंडा–९ का २९ वर्षीय मनिष तिमल्सिनाको साथबाट २६२ क्याप्सुल ट्रामाडोल र ३० ग्राम गाँजा फेला परेको जिल्ला प्रहरी कार्यालय मकवानपुरले जनाएको छ ।