मकवानपुर — नेपालमा ८५ प्रतिशतभन्दा बढी ज्येष्ठ नागरिक ग्रामीण क्षेत्रमा बस्ने गरेको पाइएको छ ।

आइतबार राष्ट्रिय समावेशी आयोगले हेटौंडामा आयोजना गरेको वृद्धाश्रम सञ्चालन तथा व्यवस्थापन सम्बन्धी आधार र मापदण्ड विषयक छलफल कार्यक्रममा यस्तो तथ्य सार्वजनिक भएको हो ।

ग्रामीण क्षेत्रमा बस्ने अधिकांश ज्येष्ठ नागरिकहरु कृषि पेसामा आवद्ध रहेको र अवसरबाट वञ्चित हुन पुगेको आयोगका सचिव बलराम निरौलाले जानकारी दिए । अशिक्षा र कमजोर खानपानको कारण ज्येष्ठ नागरिकहरुमा पोषणको समस्या समेत देखिने गरेको उनले बताए । आयोगका अनुसार ६५ वर्षभन्दा माथिको उमेरका ज्येष्ठ नागरिकहरुमध्ये ४७ प्रतिशत ज्येष्ठ नागरिकहरु अझै आर्थिक रुपमा सक्रिय रहेका छन् ।

८० प्रतिशतभन्दा बढी ज्येष्ठ नागरिकहरु छोरासँग बस्ने गरेको र छोरीसँग बस्ने ज्येष्ठ नागरिकहरुको अनुपात २ दशमलव ७ प्रतिशत रहेको आयोगका सचिव निरौलाले बताए । २०७८ सालको जनगणना अनुसार नेपालको कूल जनसंख्याको वार्षिक वृद्धिदर ० दशमलव ९२ प्रतिशत रहँदा ज्येष्ठ नागरिकहरुको वार्षिक वृद्धिदर भने ३ दशमलव २९ प्रतिशत रहेको आयोगले जनाएको छ । २०५८ सालको जनगणना अनुसार नेपालमा ज्येष्ठ नागरिकको संख्या कुल जनसंख्याको ६ दशमलव ५ प्रतिशत अर्थात् १५ लाख, २०६८ मा ८ दशमलव १३ प्रतिशत अर्थात् २१ लाख ५४ हजार र २०७८ मा १० दशमलव २१ प्रतिशत अर्थात् २९ लाख ७० हजार रहेको छ ।