सिन्धुपाल्चोक — बाह्रबिसे नगरपालिका-७ ज्यामलिङ गाउँकी ११ वर्षीया निमा साङ्गमु लामाका हात चल्दैनन्, बोल्न सक्दिनन् । आफ्नै खुट्टाले राम्रोसँग उभिन पनि नसक्ने उनी थरथर काम्छिन् । तर उभिँदा राम्रोसँग काम नगर्ने उनका खुट्टाले उनी अक्षर लेख्न र चित्र कोर्न भने सहजै सक्छिन् ।

गाउँको बालकल्याण आधारभूत विद्यालयमा भर्ना भएकी उनी आजभोलि कक्षामा बसेर पढिरहेकी छन्, खुट्टाले लेखेर अक्षर चिन्दैछिन्।

खुट्टाले अक्षर खुट्याएर लेख्नेमात्रै होइन, आकर्षक चित्र कोरेर समेत उनले साथीभाई र गुरुहरूलाई चकित पार्छिन् । शारीरिकरुपमा अशक्तता भएपनि उनको अध्ययन र चित्रमा लगनशिलता देखेर शिक्षक र अभिभावकहरू चकित छन् ।

निमा एक वर्षकी हुँदा घर नजिकै लडेर घाइते भएकी थिइन् । 'लडेर घाइते भएपछि बेलैमा उपचार गराउन सकिएन, बाह्रबिसे प्राथमिक स्वास्थ्य केन्द्रमा लगेर उपचार गराएँ । तर घाउ निको भएपनि हात चलेन,' निमाका बुवा दावा लामाले भने।

परिवारको आर्थिक अवस्था राम्रो छैन । जसको प्रभाव निमाको हेरचाह र उपचारमा परेको छ । बाह्रबिसे नगरपालिकाका कार्यपालिका सदस्य निमाराज शेर्पाले परिवारले आर्थिक अभावकै कारण निमाको राम्रो उपचार र पढाइको प्रबन्ध गर्न नसकेको बताए । 'उहाँको परिवारलाई दुई छाक जोहो गर्नै कठिन छ । अनि नानीको उपचार कसरी गर्नू र?,' लामाले भने, 'त्यसको प्रत्यक्ष असर सिंगो परिवारमा परेको छ।'