हेटौंडा — पूर्वपश्चिम सडक खण्ड अर्न्तगत मकवानपुरको मनहरी गाउँपालिका—६ सुनाचुरीमा बस र कार ठोक्किँदा बेहुला र बेहुलीसहित पाँच जना घाइते भएका छन् ।
विराटनगरबाट काठमाडौंतर्फ जाँदै गरेको बिएबी ११४७ नम्बरको कार र काठमाडौंबाट वीरगन्जतर्फ जाँदै गरेको बा प्र ०१—००६ ख ५७७३ नम्वरको बस बुधबार बिहान साढे ३ बजे सुनाचुरीमा एक आपसमा ठोक्किँदा कारमा सवार बेहुलाबेहुलीसहित ५ जना घाइते भएका हुन् ।
घाइते हुनेहरुमा काभ्रे पनौती नगरपालिका—१० का २८ वर्षीय बेहुला यसबराज अधिकारी, बेहुली २२ वर्षीया श्रद्धा दाहाल, २३ वर्षीया पुष्पा अधिकारी, २३ वर्षीय त्रिशु थापा र चालक यतिराज अधिकारी रहेका छन् । घाइतेहरुलाई तत्कालै उपचारको निम्ति भरतपुर पठाएको जिल्ला प्रहरी कार्यालय हेटौंडाले जनाएको छ ।
प्रहरीका अनुसार घाइतेहरु खतरामुक्त रहेका छन् । विराटनगरमा विवाह गरेर काभ्रेतर्फ बेहुली लिएर फर्कने क्रममा दुर्घटना भएको हो । दुर्घटना हुँदा दुवै सवारी साधनमा क्षति भएको छ । बस र बस चालक नुवाकोट बेलकोटगढी नगरपालिका–१३ का ४१ वर्षीय वीरबहादुर लामालाई प्रहरी नियन्त्रणमा छन् ।
