लुम्बिनी — तीव्र सहरीकरण भइरहेको रुपन्देहीमा आन्तरिक तथा बाह्य पर्यटकको आगमन बढ्दो छ । सीमापारिबाट आउने र आन्तरिक पर्यटकको राम्रो उपस्थिति हुने भएकाले रात्रिकालीन बजार सञ्चालनको माग गर्दै स्थानीय व्यवसायीले प्रशासन, सुरक्षा निकाय तथा स्थानीय सरकारसँग पटक पटक छलफल गर्दै आएका छन् । 

गृह मन्त्रालयले तय गरेको रात्रिकालीन बजार सञ्चालनको परिधिबारे स्थानीय प्रशासनले व्यवसायीलाई बजार सञ्चालनमा सघाउने छलफल हुँदै आए पनि ठोस निष्कर्ष भइसकेको छैन । रात्रिकालीन बजार सञ्चालन व्यवसायीका लागि मात्र नभई पर्यटकीय क्षेत्रको पहिचान झल्काउनका लागि आवश्यक रहेको रेस्टुरेन्ट तथा बार एसोसिएसन बुटवलका उपाध्यक्ष कमलजंग कुँवर बताउँछन् । 

देशका विभिन्न जिल्लामा गरी १८ बढी क्याफे (ड्याडीज किचन) का सञ्चालकसमेत रहेका उनले रात्रिकालीन बजार रोजगारी सृजना, मानिसले काम सकाएर लिन चाहेको आनन्द प्राप्तिको माध्यम हुने उल्लेख गरेर आफूले जिल्ला प्रशासनमार्फत गृह मन्त्रालयमा बुँदागत पत्र नै बुझाएको सुनाए । ‘गर्मी धेरै हुने जिल्ला भएकाले यहाँ साँझपख नै मानिस परिवार, साथीभाइसँग रमाउने वातावरण खोजिरहेका हुन्छन्, स्थानीयको आवश्यकतालाई मध्यनजर गर्दा पनि रात्रिकालीन बजार चलाउनुपर्छ भन्ने लाग्छ,’ उनले भने, ‘यसका लागि सुरक्षा चुनौती हुन सक्छ, त्यसमा प्रशासनले सहयोग गरेमा व्यवसायी रातभरि सेवा प्रवाह गर्न तत्पर देखिन्छन् ।’ कुँवरले बिहानको ३ बजेसम्म प्रशासनकै अनुमति लिएर घरघरमा खाजा, खाना पुर्‍याउने सुविधा प्रदान गरिरहेका छन् । उनी भन्छन्, ‘यो सुविधा क्याफे खोलेरै दिन सक्ने हो भने बत्तीको झिलिमिली, मानिसको ओहोरदोहोरले पनि पर्यटकीय हब जसरी विकास गर्न टेवा पुर्‍याउँछ ।’

दिनभरिको काम पछि बाहिर जाने, गफ गर्दै खाने, पिउने भनेर निस्कँदा ९ बजेपछि प्रहरीले सिठी फुक्ने हुँदा भागाभाग गर्नुपर्ने स्थिति रहेको बुटवल उपमहानगरपालिका–८ का मनोज ध्वजूको गुनासो छ । उनले आफू जस्ता व्यवसायी दिनभरि सेवा प्रवाहमा व्यस्त रहने भएकाले कर्मचारी, परिवार र बाहिरबाट आउने पाहुनालाई राति बुटवल घुमाउन नपाएर सहरको बेग्लै छाप देखाउन नसकिएको बताए । ‘भारतीय पर्यटकलाई त्यहाँको जस्तो नेपाली बजारमा पनि राति पनि घुम्न मिल्ने बनाउन सकिए पर्यटकीय क्षेत्रका रूपमा विकास गर्न सहज हुने छ,’ उनले भने, ‘यसले आर्थिक गतिविधि चलायमान पनि हुने छ ।’ सुरुआतमा होटल, रेस्टुराँ क्षेत्रमा यो सेवा लागू गर्न सकिए बिस्तारै कपडा पसल, कस्मेटिक्स, अन्य बजारसमेत सञ्चालन गर्न सकिने उनले बताए ।

रात्रिकालीन बजार सञ्चालन गर्ने विषय नगरसभामा वाचन गरेरै पारित गरेको बुटवल उपमहानगरपालिकाले यसका लागि प्रयास गरिरहेको प्रमुख खेलराज पाण्डेयले बताए । उनले यसको व्यवस्थापन, व्यवसायीको चाहना र प्रशासनिक विषयमा छलफल भइरहेको बताए । ‘हामीले कुन व्यवसायीले कसरी सञ्चालन गर्न चाहन्छ भन्ने खाकासहित छलफलमा डाँक्न भनेका छौं । यसबारे व्यवसायीको उत्सुकता आवश्यक छ, हामी सहकार्यमा अघि बढ्न तयार छौं,’ उनले भने । रात्रिकालीन बजार चल्ने बित्तिकै पर्यटक आगमन बढ्ने मात्र नभई बुटवल गुल्जार बनेर देशभरि पर्यटकीय सहर बनेको सन्देश जाने पाण्डेयले जनाए ।