दिक्तेल रूपाकोट मझुवागढी नगरपालिकाको आयोजनामा भएको १० दिने उद्यम तथा प्राविधिक सीप विकास तालिममा सहभागी २६ विद्यार्थीले गहुँको छ्वालीबाट आकर्षक कला सिर्जना गर्न सिकेका हुन् ।
खोटाङ — दिक्तेल रूपाकोट मझुवागढी नगरपालिका–१२ जालपास्थित जालपा माविका विद्यार्थीहरूले गहुँको छ्वालीबाट आकर्षक कला सिर्जना गर्न सिकेका छन् । दिक्तेल रूपाकोट मझुवागढी नगरपालिकाको आयोजनामा भएको १० दिने उद्यम तथा प्राविधिक सीप विकास तालिममा सहभागी २६ विद्यार्थीले गहुँको छ्वालीबाट आकर्षक कला सिर्जना गर्न सिकेका हुन् ।
उद्योग वाणिज्य तथा आपूर्ति मन्त्रालयको २ लाख ४८ हजार रूपैयाँको बजेटमा उक्त तालिम सम्पन्न भएको हो । उक्त विद्यालयमा कक्षा ६ मा अध्ययरत ९ वर्षीया अनमिका राईले तालिममा आकर्षक कला सिर्जना गर्न जानेपछि खुसी लागेको उनकी आमा अन्जु राईले बताएकी छन् । तालिममा सहभागी विद्यार्थीहरूले यसलाई थप निरन्तरता दिने बताएका छन् । ‘रङको माध्यमबाट चित्र कोर्न जाने पनि छ्वालीबाट बनाउन जानेकी थिइनँ, तालिम लिएपछि जाने,’ कक्षा ८ मा अध्ययरत १३ वर्षीया भूमिका गुरुङले आइतबार भएको समापन कार्यक्रममा भनिन्, ‘अब छुवालीबाट सिर्जना गर्ने कलालाई पनि निरन्तरता दिन्छु ।’
त्यस्तै कक्षा ८ मै अध्ययनरत सञ्जीता विश्वकर्माले पनि कलालाई निरन्तरता दिने बताएकी छन् । उनीहरूले जानेको सीपलाई आगामी वैशाख ४–६ गतेसम्म अन्तर्राष्ट्रिय जैविक विविधता रेडपान्डा थार सम्मेलनमा आउने अतिथिहरूलाई मायााको चिनोका रूपमा प्रदान गरिने दिक्तेल रूपाकोट मझुवागढी नगरपालिकाका प्रमुख तीर्थराज भट्टराईले बताए । विद्यार्थीले सोचेभन्दा राम्रो कला सिर्जना गरेकाले यसप्रति उनीहरूको भविष्य राम्रो देखिएको प्रशिक्षक प्रकाश मिजारले जनाए । ‘मैले सोचेभन्दा राम्रो कला सिर्जना गर्नु भयो,’ उनले भने, ‘उहाँहरूको कला हेर्दा भविष्य राम्रो देखो ।’
गत वर्ष पनि नगरपालिकाको पहलमा उक्त विद्यालयमा चित्रकला प्रशिक्षण आयोजना गरिएको थियो । अस्ट्रेलियन चित्रकार ‘रे’ले चित्रकला सिकाएका थिए । त्यही चित्रकलामा सहभागी विद्यार्थीलाई पुनर्ताजगी तालिमको रूपमा यो वर्ष गहुँको छ्वालीबाट चित्र बनाउने तालिम आयोजना गरिएको विद्यालयका प्रधानाध्यापक दिलबहादुर राईले जनाएका छन् ।
त्यस्तै उक्त विद्यालयको ६५ औं वार्षिक उत्सव पनि मनाएको छ । खेलकुद, विज्ञान तथा गणित प्रदर्शनी, सांगीतिक कार्यक्रम आयोजना गरी आइतबार वार्षिक उत्सव मनाएको हो । यसअन्तर्गत अभिभावकको डोरी तान्ने खेल, छात्र–छात्रा भलिबल, छात्र–छात्रा ब्याटमिन्टन, छात्र–छात्रा टेबलटेनिस, शिक्षक–शिक्षिकाको ब्याडमिन्टन तथा सांगीतिक कार्यक्रम आयोजना गरी उत्सव मनाएको विद्यालयको प्रअ राईले बताएका छन् ।
