रौतहटका जंगलमा बढे वन्यजन्तु- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

रौतहटका जंगलमा बढे वन्यजन्तु

शिव पुरी

रौतहट — पछिल्लो समय रौतहटको राष्ट्रिय वनभित्र वन्यजन्तुको संख्या बढेपछि यसको संरक्षण र निगरानीका लागि डिभिजन वन कार्यालयले विभिन्न स्थानमा जडान गरेको क्यामेरा ट्र्यापमा पाटे बाघ रेकर्ड भएको छ । क्यामेराकै मद्दतले राष्ट्रिय वनभित्र ५ वटा पाटे बाघ भएको फेला परेको छ । 

रौतहटको चन्द्रपुर-६ को तरतरे वनक्षेत्रस्थित पाटेबाघको ओडार क्षेत्र । फाइल तस्बिर : कान्तिपुर

चार महिनाअघि चन्द्रपुर ६ स्थित तुरतुरेधारा वनक्षेत्रमा पाटेबाघको आक्रमणमा परी एक युवकको मृत्युपछि वन कार्यालयले वन्यजन्तुको अवस्था पत्ता लगाउन क्यामेरा जडान गरेको थियो । वन्यजन्तु ओहोरदोहोर गर्ने र बासस्थान क्षेत्रमा १७ जोडी क्यामेरा राखिएका छन् । त्यही क्रममा बाघको संख्या बढेको फेला परेको निमित्त डिभिजन वनप्रमुख अमरदेव यादवले बताए ।

‘अहिले रौतहटको वनमा ५ वटा पाटेबाघ देखिएका छन्,’ उनले भने, ‘पछिल्लो समय वनमा बाघसँगै अन्यवन्यजन्तु बढेको छ ।’ तुरतुरे, लमाहा, सत्तेरी, गैंडाटार, जुडिबेला क्षेत्रमा बाघको गतिविधि बढेको भन्दै वनले प्रवेशमा रोक लगाउँदै आएको छ । तुरतुरे क्षेत्र विगत एक दशकदेखि बाघको बासस्थानमा रूपमा परिचित छ ।

यहाँ घनघोर जंगल छ । घोल र साना नदी छेउमा अग्ला डिलहरू छन् । डिलको आडैमा बाघको ओडार छ । त्यही ओडारमा घास काट्दै गएका चन्द्रपुर ६ का ३० वर्षीय संगम भण्डारीको बाघको आक्रमणमा परी मृत्यु भएको थियो । राति उनलाई खोज्न गएकाहरूलाई समेत बाघले आक्रमण गरेको थियो । ओडारमा बाघको बच्चा (डमरु) हरूसमेत देखिएका छन् ।

यहाँको वन वन्यजन्तुको बासस्थानको रूपमा विकसित हुँदै गएको छ । पर्याप्त घोल, झाडी र सिमसारका कारण वन्यजन्तु बढेको हो । बेलाबेलामा चितवन राष्ट्रिय निकुञ्जबाट गैंडा, हात्ती, बाघ यही क्षेत्रमा आएर बस्ने गरेका छन् । प्रदेश २ वन मन्त्रालयका सचिव रामचन्द्र कँडेलले वन्यजन्तुको संख्या बढेकाले संरक्षणमा ध्यान दिनुपर्ने बताए । पछिल्लो समय बाघ, गैंडा, बाघ, हात्ती, नीलगाई, हरिणलगायतको वन्यजन्तु तराईको जंगलमा देखिन थालेको छ । पर्सा निकुञ्जदेखि पूर्वी क्षेत्र बकैया र यहाँको चन्द्रनिगाहपुर, गैंडाटार, हिलेखोला, जुडिबेला, जंगलसैया वनक्षेत्र गैंडालगायत वन्यजन्तको बासस्थानका लागि राम्रो भएको डिभिजन वनले जनायो । यहाँको जंगलमा वन्यजन्तुलाई चाहिने घासे मैदान, पानीको स्रोत र आहाल बस्न पर्याप्त घोल छ ।

राष्ट्रिय वनभित्र सिकारीको गोली वा सवारीको ठक्करबाट घाइते वन्यजन्तुको उपचारका लागि डिभिजन वन चन्द्रनिगाहपुरले वन्यजन्तु उद्धार गृह सञ्चालनमा ल्याएको छ । उद्धार गृहलाई मोटो फलाम जडान गरी चारै तिर रडको जालीले घेरेर बनाइएको छ । यसभित्र ४/५ वटा सम्म वन्यजन्तु राख्न सकिन्छ ।

केही दिनअघि घाइते एउटा मलसाप्रो फेला पारेर उद्धार गृहमा राखी उपचारका लागि चितवन राष्ट्रिय निकुञ्ज पठाइएको थियो । पूर्वपश्चिम राजमार्गको धन्सार–वाग्मती खण्डमा दिनहुँ हरिणको झुन्ड बाटो काटेर ओहोरदोहोर गर्छन् । त्यही क्रममा सवारीको ठक्करबाट घाइते/मृत्यु हुने गरेको पाइएको छ ।

घाइतेलाई तत्काल उपचारका लागि उद्धार गृहमा ल्याइने र निकुञ्जका चिकित्सकसहितको टोलीलाई उपचारका लागि पठाइने डिभिजन वनका निमित्त प्रमुख यादवले बताए ।

प्रकाशित : वैशाख २६, २०७८ १३:२६
प्रतिक्रिया
पठाउनुहोस्

ब्रुकलिन फिल्म फेस्टिभलमा ‘महानगर’

कान्तिपुर संवाददाता

काठमाडौँ — अमेरिकाको ब्रुकलिन फिल्म फेस्टिभलमा नेपाली फिल्म ‘महानगर’ छनोट भएको छ । जुन ४ देखि १३ सम्म चल्ने २४औं संस्करणको फेस्टिभलमा ९३ देशबाट सहभागिताका लागि आएका २५ सय फिल्महरुमा ‘महानगर’ले आफ्नो स्थान बनाएको हो । 

फिल्मका क्रिएटिभ प्रोड्युसर नवनिधि दाहालले फिल्मको अमेरिका प्रिमियर सोही फेस्टिभलसँगै हुने जानकारी गराएका छन् । भारतको कोलकाता फिल्म फेस्टिभलमा फिल्मको वर्ल्ड प्रिमियर गरिएको थियो ।

ब्रुकलिन फिल्म फेस्टिभलमा यसअघि दुई नेपाली फिल्मले सहभागिता जनाइसकेका छन् । सन् २००९ मा ‘सारी सोल्जर्स’ यो फेस्टिभलमा छनोट भएको थियो भने सन् २०१७ मा सुनिल पाण्डे निर्देशित सर्ट फिल्म ‘अनन्त यात्रा’ पनि यहाँ छनोट भएको थियो ।

मोहन राईले निर्देशन गरेको ‘महानगर’ कोलकाता फिल्म फेस्टिभलमा फिल्म एसियन सेलेक्ट अन्तर्गत ‘दि नेटवर्क फर दि प्रमोसन अफ एसियन सिनेमा’ (नेटप्याक) अवार्डका लागि प्रतिस्पर्धात्मक विधामा छनोट भएको थियो । कर्मा शाक्य र मेनुका प्रधानको मुख्य भूमिका रहेको फिल्मले एक रातको कथा भन्छ ।

सानो घटनाका कारण सागै रात गुजार्न बाध्य उनीहरुको जीवनमा त्यही रातले ल्याउने परिवर्तन फिल्मको कथा हो । फिल्ममा अनोज पाण्डे, शोविता अधिकारी, जीवन बराल, परीक्षितविक्रम राणा, चन्द्र पाण्डे आदि कलाकार पनि अभिनय रहेको छ । ‘अञ्जली’ र ‘सखी’ नामका दुई फिल्म बनाएका मोहनको ‘महानगर’ फिचरमा डेब्यु फिल्म हो । ‘अञ्जली’ तेस्रो लिंगी अञ्जली लामाको जीवनीमा बनाएको डकुमेन्ट्री फिल्म हो भने ‘सखी’ छोटो फिल्म ।

फिल्मलाई माउन्टेन रिभर फिल्म्सको सहकार्यमा मिडलवे फिल्म्सले निर्माण गरेको हो । निर्देशक राई स्वयंको लेखन रहेको यो फिल्मको कार्यकारी निर्माता गोविन्द पराजुली हुन् । फिल्ममा नरेन्द्र मैनालीको छायांकन, संगम पन्थीको संगीत र परीक्षित झाको सम्पादन छ ।

प्रकाशित : वैशाख २६, २०७८ १३:२६
पूरा पढ्नुहोस्
प्रतिक्रिया
पठाउनुहोस्
×