राजविराज — अत्यधिक जाडोसँगै चिसो हावा चलेपछि यहाँका जनजीवन प्रभावित भएको छ । अघिल्ला दिनहरुको तुलनामा मंगलबार बिहानबाट चिसो हावा चल्नाले जाडो अत्यधिक बढेको हो । 

मंगलबार बिहानै भूकम्पको धक्का महसुसपछि बदलिएको सप्तरीलगायत क्षेत्रको मौसम दिन लाग्नासाथ थप बिग्रिएको छ । अत्यधिक रुपमा चिसो हावा चल्नाका कारण जनजीवन प्रभावित भएको हो । चिसो अत्यधिक बढेपछि बजार क्षेत्रमा सर्वसाधारणको उपस्थिति पातलिँदो छ । सरकारी कार्यालयहरुमा पनि सेवाग्राहीको संख्या घट्दो क्रममा छ ।  

मंगलबार बिहानबाट मौसम परिवर्तित हुँदै अत्यधिक चिसो बढेपछि शितलहर चल्दा पशु चौपायासमेत समस्यामा परेको छ ।   पशु चौपायालाई  गोठघर (गुहाली) र दरबजामै बाक्लो कपडाको ओढ्ना दिएर न्यानो बनाएर राख्दै चौपायालाई जाडोबाट बचाउन ग्रामीण क्षेत्रमा घुरसमेत बाल्न सुरु गरिएको छ ।