राजविराज — जिल्ला मालपोत कार्यालय सप्तरीमा फेरि किर्ते काण्ड सार्वजनिक भएको छ । अमेरिकामा रहेका जग्गाधनीले पत्तै नपाई उनको जग्गा खरिद–बिक्री गरिएको रहस्य खुलेसँगै मालपोत सप्तरीमा अर्को किर्ते सार्वजनिक भएको हो ।

कार्यालयकै कर्मचारीको मिलेमतोमा सक्रिय किर्ते गिरोहले जग्गाधनीलाई थाहै नदिई जग्गा बिक्री गरेको हो ।

सप्तरी जिल्लाको साविक बैरवा गाविस ६ घर भई हाल अमेरिका बस्दै आएकी उषादेवी अर्यालको नाउँमा रहेको राजविराज नगरपालिका ६ को कित्ता नम्बर ३५२ को २ कठठा, कित्ता नम्बर ३९४ को ८ धुर र कित्ता नम्बर ३९७ को एक कठठा एक धुर जग्गा मालपोत कर्मचारीको मिलेमतोमा किर्ते गर्ने गिरोहले अर्याललाई थाहै नदिई बिक्री गरेको हो । उनको जग्गा पहिलो चरणमा साबिक फर्सेठ गाविस ९ का फुदन साहले रसिद नम्बर ८७८५ नम्बरबाट ०७४ साल पुस १३ गते किर्ते लिखत खडा गरी आफनो नाममा राजीनामा पास गराएका थिए । त्यस समयमा मूल जग्गाधनी अर्याल अमेरिका थिइन् ।

फुदन साहले किर्ते लिखत कायम गरी आफनो नाममा किर्ते राजीनामा पास गराएको जग्गा फेरि कर्मचारीकै मिलेमतोमा अर्को व्यक्तिलाई समेत बिक्री गरेका थिए । ०७४ पुसमा किर्ते गरी अर्काको जग्गा आफनो नाममा पारेका फुदनले एक महिनापछि ०७४ माघ १४ गते रसिद नम्बर १००४५ मार्फत कित्ता नम्बर ३९४ को ८ धुर र कित्ता नम्बर ३९७ को एक कठठा एक धुर जग्गा साविक गम्हरिया प्रवाहा गाविस ७ की घुरनीदेवी साहको नाममा राजिनामा पास गरिदिएका थिए ।

यस्तै रसिद नं १०३३१ बाट ०७४ माघ १७ गतेका दिन कित्ता नम्बर ३५२ को २ कठठा जग्गा राजविराज ४ की देवरानी दासको नाममा राजीनामा पास गरिदिएका थिए ।