बर्दिया — चर्को गर्मीमा न्यून विद्युत भोल्टेजले राम्रोसँग पंखा घुम्दैन । न्यून विद्युत भोल्टेजकै कारण अन्य विद्युतीय उपकरण राम्रोसँग चल्दैनन् । बेलाबेला विद्युत कटौती हुँदा बर्दियाका सर्वसाधारण हैरान बनेका छन् । 

बेलाबेला विद्युत आउने जाने क्रमले फ्रिज, मोटरलगायत विद्युतीय उपकरण बिग्रिने चिन्तासमेत बढको छ । न्यून भोल्टेज र बेलाबेला विद्युत कटौती पहिलादेखिको समस्या हो । तर, लामो समयदेखिको समस्या गुलरिया वितरण केन्द्रले समाधान गर्न नसक्नु चरम लापरवाही रहेको सर्वसाधारणले गुनासो गर्छन् ।

बस्ती वरिपरी हरेक दिनजसो रातिमा चितुवा देखिने गरेको गुलरिया नगरपालिका–८ की सुनिता चौधरीले बताइन् । ‘न्यून भोल्टेजका कारण पंखा घुम्दैन,’ उनले भनिन्,‘अत्याधिक गर्मीमा पंखा नचल्दा घरभित्र सुत्न सकिदैन । चितुवाको त्रासबीच साना बालबच्चासहित बाहिर सुत्नुपर्छ ।’ 

गर्मी सिजन सुरु भएसँगै सधैं विद्युतको यस्तै समस्या हुने गरेको गुलरिया नगरपालिका–१० का रमेश लोधले बताए । ‘दिनभरि गर्मीमा काम गर्छौं, रातिमा मज्जाले निदाउन पनि सक्दैनौं । घरमा विद्युत लाइन जोडेर महसुल बुझाउने काम मात्र भइरहेको छ ।’