बर्दिया — जिल्लामा समुदाय विपद् स्वयंसेवक आधारभूत तालिम सुरु भएको छ । गुलरिया नगरपालिका–८ सुरजपुरस्थित सशस्त्र प्रहरी बल नेपाल नम्बर ३१ गण हेडक्वार्टरमा बिहीबार तालिमको उद्घाटन भएको हो । 

तालिममा सहभागी प्रशिक्षार्थीलाई विपद् व्यवस्थापनसम्बन्धी आधारभूत ज्ञान, बाढीपहिरो, डुबान, डोरीद्वारा गरिने उद्धार, सडक तथा यान्त्रिक दुर्घटनामा उद्धार, लागलागी नियन्त्रण, भूकम्पीय जोखिम न्यूनीकरण पहिलो उपचारका बारेमा सैद्धान्तिक तथा व्यावहारिक ज्ञान दिइयो । उक्त तालिम वैशाख २४ गतेसम्म चल्नेछ ।

१८ दिने विपद्सम्बन्धी तालिमले धेरै कुरा सिकाउने अपेक्षा राखेको राजापुर नगरपालिका–५ की प्रशिक्षार्थी पार्वती थारुले बताइन् । । ‘राजापुरमा बाढीको जोखिमका साथै बाघ आक्रमण पनि बढी हुन्छ,’ उनले भनिन्, ‘यस तालिमबाट विपद्‍बाट आफू कसरी बच्ने र अरूलाई कसरी सुरक्षित राख्ने विषयमा सिकेर समुदायका अरुलाई सिकाउनेछु ।’

आर्थिक वर्ष ०८२/०८३ मा ५० जना समुदाय विपद् स्वयंसेवक तयार गर्ने कार्ययोजना रहेको सशस्त्र प्रहरी बल नेपाल नम्बर ३१ गणका गणपति दिनेशकुमार महतले बताए । ‘अहिले संचालन भएको तालिममा जिल्लाका आठवटै पालिकाबाट २५ जना प्रशिक्षार्थी सहभागी छन् र यो तालिम समापनपश्चात् पुनः अर्को तालिम संचालन हुनेछ,’ गणपति महतले भने, ‘उत्कृष्ट ढंगबाट तालिम संचालन गर्न सशस्त्र प्रहरी निरीक्षकसहित ९ जना प्रशिक्षक खटाइएको छ ।’ यस तालिमले विपद्‍बाट हुने क्षति न्यूनीकरणमा सहयोग पुग्ने विश्वास लिइएको छ । विपद् प्रतिकार्यको तयारीस्वरूप यस गणबाट जिल्लाका प्रत्येक वडामा २५ जनाका दरले विपद् सूचकसमेत निर्माण गरिएको छ  ।

वडास्तरदेखि संघस्तरसम्म विपद् व्यवस्थापनको बलियो संरचना छ तर विपद्को पूर्वतयारी, व्यवस्थापन गर्ने सन्दर्भमा आफूहरू अत्यन्तै पछाडि रहेको प्रमुख जिल्ला अधिकारी गोगनबहादुर हमालले बताए । ‘पालिकास्तरमा सशस्त्र प्रहरी बलले यो वर्ष ५० जना समुदाय विपद् स्वयंसेवक उत्पादन गर्ने लक्ष्य लिएको छ,’ उनले भने, ‘यस कार्यमा सशस्त्र प्रहरी बललाई विशेष धन्यवाद दिन चाहन्छु ।’