असन्तुष्ट पक्षद्वारा विरोध ।
What you should know
धनकुटा — फागुन २१ का लागि तोकिएको प्रतिनिधि सभा निर्वाचनका लागि धनकुटाबाट नेकपा एमालेले पूर्वमन्त्री राजेन्द्रकुमार राईको एकल नाम सिफारिस गर्ने निर्णय गरेको छ । आइतबार बसेको जिल्ला कमिटीको विस्तारित बैठकले राईका नाममा सहमति जुटाएको एमाले धनकुटाका अध्यक्ष शिव आङ्ला लिम्बुले बताए ।
पार्टी संगठन सुदृढीकरण, जनाधार, राजनीतिक योगदान र निर्वाचन जित्ने क्षमतालाई आधार मानेर उनको नाम सिफारिसको निर्णय गरिएको लिम्बुको भनाइ छ । उम्मेदवारीका लागि एमाले कोशी प्रदेश कमिटी उपाध्यक्ष टीकाराम चेम्जोङ र पूर्व केन्द्रीय सदस्य शकुन्तला बस्नेत पनि इच्छुक देखिएका थिए । चेम्जोङ २०७० सालमा भएको दोस्रो संविधान सभा निर्वाचनमा धनकुटा क्षेत्र १ बाट संविधानसभा सदस्यमा निर्वाचित भएका थिए ।
अन्तिम समयमा राजेन्द्रको नाममा सर्वसम्मत निर्णय भएको लिम्बूले बताए । ‘टीका कमरेडले राजेन्द्र कमरेडलाई नै समर्थन गर्नुभयो,’ उनले भने ।
एमाले धनकुटा अध्यक्ष लिम्बुले राजेन्द्रकुमार राईको नाम सर्वसम्मत भएको दाबी गरे पनि एमाले कोशी प्रदेश कमिटी सचिवालय सदस्य इन्द्रमणी पराजुलीले उम्मेदवारको निर्णयमा एकलौटी गरिएको आरोप लगाएका छन् । ‘उम्मेदवारका आकांक्षी तीन जना हुनुहुन्थ्यो, तीनै जनाका बीचमा सहमति गराउने भन्ने कुरा हो, तर अध्यक्ष लिम्बुले राजेन्द्रजीको एकल नाम भनेर घोषणा गर्नुभयो,’ उनले भने । पूर्वकेन्द्रीय सदस्य शकुन्तला बस्नेतले जिल्ला अध्यक्ष लिम्बुले आफूहरूको कुरा नसुनेको आरोप लगाइन् । ‘हामीले आकांक्षीबीचमा सहमति भएपछि मात्रै निर्णय गरौं भनेका हौं, तर उहाँहरूले हाम्रो कुरा सुन्नु भएन,’ उनले भनिन्, ‘यो एकलौटी पेलाइ भयो । अब हामी चुप लागेर बस्दैनौं ।’
धनकुटाबाट आफ्नो एकल नाम सिफारिस भएपछि राईले कान्तिपुरसँग भने, ‘साथीहरूले सिफारिस गर्नुभएको छ, त्यही अनुसार निर्वाचनको तयारीमा जुट्ने छौं ।’
