म्याग्दी — नेकपा एमालेका उपमहासचिव तथा पूर्वपरराष्ट्र मन्त्री प्रदीप ज्ञवालीले हालै प्रधानमन्त्री केपी शर्मा ओलीको छिमेकी चीन भ्रमणका क्रममा भएको बेल्ट एन्ड रोड इनिसिएटिभ (बीआरआई) सम्झौता उपलब्धिमूलक भएको बताएका छन् । एमाले म्याग्दीले शनिबार बेनीमा आयोजना गरेको कार्यकर्ता प्रशिक्षण कार्यक्रममा ज्ञवालीले पत्रकारसँग कुराकानी गर्दै यस्तो बताएका हुन् ।
‘सन् २०१७ मा सहमति भई कार्यान्वयन हुन नसकेको बीआरआईको ड्राफ्टमा अहिले सम्झौता भएको छ,’ उनले भने, ‘कसैसँग सहयोग लिएकै आधारमा छिमेकीसँगको सम्बन्धमा असर पुग्दैन ।’
चीन भ्रमण र बीआरआई सम्झौतासँग जोडेर देशमा ओली सरकार परिवर्तन हुने हल्ला चलाइएको भन्दै नेता ज्ञवालीले मुख्य प्रतिस्पर्धी दल कांग्रेस र एमालेबीचको गठबन्धन २०८४ सम्मै चल्ने पनि दाबी गरे । ‘कहिले बंगलादेश बनाउने, कहिले कोशी प्रदेशको नाम परिवर्तन गर्छौं भन्ने त कहिले दरबारियासँग साँठगाँठ गरी अस्थिरता मच्याउन चाहनेले नै सरकार परिवर्तनको पनि हल्ला चलाएका हुन्,’ उनले थपे, ‘सधैं ३२ सिटको जादुले काम गर्दैन, अब यो फर्मुला पुरानो भयो ।’
