रामेछाप — रामेछापको मन्थली नगरपालिका–१ सानीमदौमा सात करोड लागतमा निर्माण भएको चिस्यान केन्द्र अलपत्र बनेको छ । बागमती प्रदेश सरकार र मन्थली नगरपालिकाको ७०/३० लागत साझेदारीमा निर्माण गरिएको चिस्यान केन्द्र सञ्चालनमा आउन नसकेको हो ।

झन्डै सात करोड रुपैयाँ लागतमा निर्माण गरिएको उक्त केन्द्र इजी इन्फ्रा प्रालि काठमाडौंले २०७८ असारभित्र सम्पन्न गर्ने गरी जिम्मा लिएको थियो । तर निर्माणमा दुई वर्ष ढिलाइ भई २०८० साउनमा मात्रै काम सकिएको थियो । चिस्यान केन्द्रकाे परीक्षण भइसके पनि हालसम्म प्रयोगमा आउन सकेको छैन । 

स्थानीय शान्ता सुवेदीका अनुसार यसको प्रत्यक्ष असर जुनार, किबी, आलु र तरकारी उत्पादनमा आश्रित किसानमाथि परेको छ । उनले भनिन्, ‘करोडौं लगानी गरिएको संरचना बन्द छ । चिस्यानकाे सुविधा नहुँदा किसान समस्यामा छन् ।’

पाँच सय मेट्रिक टन क्षमताको याे चिस्यान केन्द्र जिल्ला सदरमुकाममा मन्थली र रामेछाप नगरपालिकासहित जिल्लाभर उत्पादन भएका फलफूल तथा तरकारी जन्य उपज भण्डारण गर्ने उद्देश्यले निर्माण गरिएको हो ।

तर केही ठाउँका किसानले अपायक भएकाले वैकल्पिक व्यवस्था पनि गरिनुपर्ने माग गरेका छन् । रामेछाप नगरपालिका–६ का कृषक पुष्करबहादुर कार्कीका अनुसार चिस्यान केन्द्र किसानलाई अपायक स्थानमा निर्माण भएको बताए । उनले भने, ‘ओख्रेनीबाट २५ किलोमिटर टाढा पर्छ । एक त गाडीको समस्या छ, अर्कोतर्फ कच्ची सडकमा सामान ढुवानी गर्दा बिग्रने सम्भावना हुन्छ । भोलीका दिनमा चिस्यानमा राखेर एक–दुई महिनापछि निकाल्दा फाइदा भन्दा घाटा हुने देखिन्छ ।’ चिस्यान केन्द्र अपायक स्थानमा भएकाले कृषि उपज उत्पादन हुने बस्तीमा सानासाना ‘कोल्ड च्याम्बर’ पनि बनाउनुपर्ने उनले बताए ।