दोलखा/म्याग्दी — मौसममा आएको बदलीसँगै उच्च हिमाली क्षेत्रमा हिमपात हुनुका साथै तल्लो क्षेत्रमा हिउँदे वर्षा भएको छ । पर्यटकीय क्षेत्र कालिञ्चोकमा शनिबार साँझबाट हिमपात भइरहेको छ । यस्तै रोल्वालिङ क्षेत्रको बेदिङ र ना गाउँमा पनि हिमपात भएको छ । उता म्याग्दीका पर्यटकीय क्षेत्र पुनहिल, महरेडाँडा, खाेप्रा क्षेत्रमा हिमपात भएको छ ।
दोलखाको तल्लो क्षेत्रमा मकै छर्ने बेलामा हिउँदे वर्षा भएपछि किसानले राहत महसुस गरेका छन् ।
माथिल्लो क्षेत्रमा सुक्खाले आलु बारीमै डढ्न लागेको बेलामा सामान्य वर्षा भएपछि किसान उत्साहित बनेका छन् । पर्यटकीय क्षेत्र कालिञ्चोकमा हिमपातपछि स्थमनी होटल व्यवसायी पनि उत्साहित बनेका छन् ।
यस्तै, म्याग्दीका पर्यटकीय क्षेत्र पुनहिल, महरेडाँडा, खाेप्रा समेतका माथिल्लाे भेगमा याे वर्षकाे पहिलाेपटक हिमपात सुरु भएकाे छ । घाेरेपानीका पर्यटन व्यवसायी तारा गर्वुजाका अनुसार आज दिउँसाे ४ बजेदेखि हल्का हिमपात सुरु भएकाे हाे । तल्लाे क्षेत्रमा भने याे वर्षकाे पहिलाे वर्षा भइरहेकाे छ ।
'हिउँदे बालीका लागि खडेरीकाे सामना गर्नुपरे पनि बर्खे खेती मकै छर्ने उपयुक्त समयमा पानी परेकाे छ, हामी कृषक खुसी छाैं,' अन्नपूर्ण गाउँपालिका-६ घारका कृषक लीलबहादुर खड्काले भने, 'पानीले जमिन राम्ररी भिज्याे भने मकै राम्ररी उम्रिन्छ ।'
हिमालपारिकाे मुस्ताङमा पनि वर्षकाे पहिलाे हिमपात सुरु भएकाे छ । जाेमसाेमका सञ्चारकर्मी तथा व्यवसायी सुशील थकालीका अनुसार सदरमुकाम वरपर बाक्लाे हिमपात सुरु भएकाे हो ।
