भारतीय कुस्ती खेलाडीको प्रदर्शन स्थगित

भारतीय कुस्ती महासंघका अध्यक्ष बृजभूषण शरण सिंहले यौन दुर्व्यवहार गरेको भन्दै उनीहरूले कारबाहीको मागसहित आन्दोलन थालेका थिए । भारतका खेलमन्त्री अनुराग ठाकुरले आरोपित सिंहविरुद्ध जुन १५ भित्र आरोपपत्र दायर गर्ने आश्वासन दिएपछि प्रदर्शन रोकिएको हो ।

‘सरकारले यस मामिलामा अनुसन्धान गर्नका लागि जुन १५ सम्मको समय मागेको छ, तबसम्म खेलाडीले प्रदर्शन गर्ने छैनन्,’ आन्दोलनरत कुस्ती खेलाडीले साक्षी मलिकले पीटीआईसँग भनेकी छन् । सिंह सत्तारूढ भाजपाबाट लोकसभा सांसद हुन् । उनीमाथि यौनहिंसाको आरोप लगाई कुस्तीका चर्चित खेलाडीहरू साक्षी मलिक, विनेश फोगाट र बजरंग पुनिया धर्नामा बसेका थिए । प्रहरीले सिंहविरुद्ध उजुरीसमेत लिन नमानेपछि धर्ना बस्नुपरेको खेलाडीहरूको भनाइ थियो ।