इमरान खानको निवास अगाडि कार्यकर्ता र प्रहरीबीच झडप

मंगलबार साँझ खानले एक भिडियो सन्देश सार्वजनिक गर्दै कार्यकर्ताहरूलाई बाहिर निस्कन आह्वान गरेका छन् । लाहोरस्थित जमान पार्कमा ठूलो संख्यामा खानका कार्यकर्ताहरू सडकमा उत्रिएका छन् ।

'उनीहरूले सोचेका छन् कि मलाई पक्राउ गरेपछि राष्ट्र निदाउनेछ । तर तपाईँहरूले उनीहरूलाई गलत सावित गर्नुपर्नेछ,' खानले ट्विटरमा सार्वजनिक गरेको भिडियो सन्देशमा भनेका छन् । उनले हरेक मानिसलाई आफ्नो 'सच्चा अधिकार'का लागि घरबाट निस्किएर प्रदर्शनमा उत्रन आह्वान गरेका छन् । 'यदि मलाई केही भयो भने र मलाई जेलमा राखियो भने । अथवा मलाई मारियो भने तपाईँहरूले इमरान खानबिना नै संघर्ष गरेर आफूलाई प्रमाणित गर्नुपर्ने छ । र यी चोरहरूको दासता स्वीकार नगर्नुहोला,' खानले भनेका छन् ।

पीटीआईका अन्य नेताहरूले पनि आफ्ना समर्थक तथा कार्यकर्ताहरूलाई इमरान खानप्रति ऐकबद्धताका लागि सडकमा उत्रिएर प्रदर्शन गर्न आह्वान गरेका छन् । स्थानीय समय अनुसार मंगलबार दिउँसो २ बजेदेखि नै खानको निवास अगाडि ठूलो संख्यामा सुरक्षाकर्मीहरू खटाइएको पाकिस्तानी सञ्चारमाध्यम डन न्युजले जनाएको छ । प्रहरीले भने पीटीआई अध्यक्षलाई पक्राउ गर्ने सम्बन्धमा कुनै प्रतिक्रिया दिएको छैन ।

यद्यपि पीटीआईका कार्यकर्ताहरूसँग झडपको क्रममा प्रहरीले पानीको फोहोरा र टियर ग्यास प्रहार गरेको छ । सोमबार इस्लामाबादस्थित अदालतले इमरान खानविरुद्धको 'तोसाखाना' मुद्दामा लगातार सुनुवाइ नगरेपछि फेरि पक्राउ पुर्जी जारी गरेको थियो । अदालतले पूर्वप्रधानमन्त्री खानलाई मार्च १८ सम्म अदालतमा उपस्थित गराउन पनि प्रहरीलाई निर्देशन दिएको छ ।

गत साता मात्रै खानले विवादास्पद अभिव्यक्ति दिएर समाजलाई विखण्डन गराउन खोजेको भन्दै सरकारको मिडिया सम्बन्धी नियामक निकायले टेलिभिजनमा उनको अन्तर्वार्ता प्रतिबन्ध लगाएको थियो ।