काठमाडौँ — पाकिस्तानको उत्तरपश्चिम सहर पेसावरस्थित एक मस्जिदमा सोमबार भएको आत्मघाती बम विस्फोटमा कम्तीमा ४७ जनाको मृत्यु भएको छ । १ सय ५७ जना घाइते भएका छन् । पेसावरको प्रहरी कार्यालयसहित उच्च सुरक्षा व्यवस्था रहेको क्षेत्रको मस्जिदमा विस्फोट भएको हो । 

पाकिस्तानी सञ्चारमाध्यम डन न्युजका अनुसार विस्फोटका कारण मस्जिदको मुख्य भवन पूरै भत्किएको छ । भग्नावशेषमा मानिसहरू पुरिएका थिए । उक्त भवन २५० देखि ३०० मानिस क्षमताको भए पनि विस्फोटको समयमा ३०० देखि ४०० जना मस्जिदको भवनमा रहेको समाचारमा उल्लेख छ । पेसावरका प्रहरी प्रमुख मोहम्मद इजाज खानले विस्फोटमा आत्मघाती आक्रमण भएको दाबी गरेका छन् । आक्रमणकारी धेरै वटा ब्यारिकेट पार गर्दै सो स्थानमा पुगेर विस्फोट गराएको बताइएको छ । मस्जिदमा प्रार्थना गर्नेहरूको पहिलो लाइनमा बसेका आक्रमणकारीले प्रार्थना सुरु भएपछि विस्फोट गराएका थिए । विस्फोटको कारण मस्जिदको माथिल्ला तलासमेत भत्किएको छ ।

घटनाप्रति दुःख व्यक्त गर्दै प्रधानमन्त्री सेहबाज सरिफले आक्रमण पाकिस्तानमाथि भएको भन्दा कम नभएको बताएका छन् । ‘यो पाकिस्तानमाथिको आक्रमणभन्दा कम होइन । राष्ट्र गहिरो शोकमा गुज्रिएको छ । कुनै शंका छैन कि आतंकवाद हाम्रो प्रमुख राष्ट्रिय सुरक्षा चुनौती हो,’ उनले भनेका छन् ।

साथै उनले घटनाप्रति खेद व्यक्त गर्दै पीडित परिवारप्रति समवेदना व्यक्त गरेका छन् । ‘पाकिस्तानको सुरक्षाका लागि खटिएकाहरूमाथि लक्षित गरेर आतंककारीहरूले त्रास सिर्जना गर्न खोजेका छन्,’ सरिफले भने । आक्रमणको इस्लामसँग कुनै सम्बन्ध नभएको भन्दै उनले आतंकवादको त्रासविरुद्ध पूरै पाकिस्तान एकजुट रहेको बताए । घाइतेहरूका लागि रक्तदान गर्न र उद्धारमा खटिन उनले पार्टीका कार्यकर्तालाई आह्वान गरेका छन् ।

सोमबारको घटनापछि प्रधानमन्त्री सेहबाज र सैन्य प्रमुख असिम मुनिर पेसावरमा पुगेर घटनाबारे जानकारी लिएका थिए । सूचनामन्त्री मरियम औरंगजेब, रक्षामन्त्री खवाजा असिफ, आन्तरिक मामिलामन्त्री राना सनउल्लाह पनि घटनास्थल पुगेका थिए । घटनास्थलबाट फर्किएपछि प्रधानमन्त्री सेहबाजले अकल्पनीय घटना भन्दै यो घटना सिंगो पाकिस्तानमाथिकै आक्रमण भएको बताए ।

पूर्वप्रधानमन्त्री इमरान खानले पनि आक्रमणको भर्त्सना गरेका छन् । केही महिनायता पाकिस्तानमा आतंकवादी समूह सक्रिय रहँदै आएका छन् । आतंकवादी आक्रमणका घटना बढ्दो क्रममा रहेको स्थानीय मिडियाले जनाएका छन् । सोमबारको विस्फोट पनि आत्मघाती भएको बताइएको छ । आक्रमणको जिम्मेवारी प्रतिबन्धित पाकिस्तानी तालिवानले लिएको स्थानीय सञ्चारमाध्यमले जनाएका छन् ।

विशेषगरी प्रहरीलाई लक्षित गर्दै सशस्त्र हमलाका घटना बढेका छन् । गत जनवरी २२ मा पेसावरको बाडाबेर क्षेत्रमा प्रहरी भ्यानलाई लक्षित गर्दै आक्रमण भएको थियो । त्यसको अघिल्लो दिन मात्रै धेरी जर्दारस्थित प्रहरी पोस्टमा आक्रमण हुँदा एक प्रहरी मारिएका थिए भने दुई जना घाइते भएका थिए । गत जनवरी १४ को राति पेसावरमै हतियारधारी समूहले सर्बन्द प्रहरी स्टेसनमा आक्रमण गर्दा एक अधिकृतसहित तीन प्रहरी मारिएका थिए । (एजेन्सीको सहयोगमा)