राहुलको ४ महिना लामो पैदल यात्रा पूरा
नयाँ दिल्ली — भारतीय राष्ट्रिय कंग्रेसका नेता राहुल गान्धीको ‘भारत जोडो यात्रा’ सोमबार पूरा भएको छ । गान्धीले कन्याकुमारीदेखि कश्मीरसम्म ३५७० किलोमिटरको यात्रा १३६ दिनमा पूरा गरे ।
श्रीनगरमा आफ्नो यात्राको समापन कार्यक्रममा बोल्दै उनले सिंगो भारतलाई एकजुट गर्ने र एकसाथ भएर देशलाई बलियो बनाउने आफ्नो यात्राको उद्देश्य रहेको बताए । उनले भारतीय जनता पार्टी र आरएसएसले विद्वेष फैलाएर देशलाई तोड्ने काम गरेको पनि आरोप लगाएका थिए ।
यस क्रममा प्रधानमन्त्री नरेन्द्र मोदी, गृहमन्त्री अमित शाहका गतिविधिमाथि उनले कडा प्रश्न उठाएका थिए । राहुलकी हजुरआमा समेत रहेकी भारतीय नेतृ इन्दिरा गान्धी र राजीव गान्धीको हत्याको प्रसंग निकाल्दै उनले आफूले हिंसा सहेकाले त्यसको पीडा आफूलाई थाह भएको उल्लेख गरे ।
‘हिंसाको पीडा मोदी र शाहले बुझ्न सक्दैनन्,’ उनले भने ‘कश्मीरमा म चार दिन पैदर हिँडेको छु । तर, भाजपाका कोही नेता यहाँ पैदल हिँड्ने साहस राख्ने छैनन् । किनकि उनीहरु डराउँछन् ।’
७ सेप्टेम्बर २०२२ बाट उनले पैदल यात्रा सुरु गरेका थिए । यस क्रममा उनले १४ राज्य र ७५ जिल्लाको यात्रा सम्पन्न गरे । हरेक दिन २५ किलोमिटरका दरले उनले पैदल हिँडेका थिए । कुल १३६ दिनको अवधिमा ११६ दिन उनले यात्रा गरेका थिए । बाँकी दिनमा कार्यक्रम तथा विश्राम गरेका थिए । यात्राका क्रममा उनले विभिन्न कार्यक्रममा बोल्दा भारतभित्र बढेको सामुदायिक र धार्मिक वैमनस्यता, बेरोजगारी र महँगीविरुद्ध प्रधानमन्त्री मोदी सरकारमाथि प्रश्न उठाउँदै आएका थिए ।
चार महिनाभन्दा लामो यात्रामा उनले देशैभर आम मानिससँग अन्तरक्रिया गरेका छन् । जनतामाझ बनेको उनको नकारात्मक छवि यसै यात्राले रुपान्तरण गरिदिएको विश्लेषण पनि हुने गरेको छ ।
प्रकाशित : माघ १६, २०७९ १७:१८
