इरानमा ५.९ म्याग्निच्युडको शक्तिशाली भूकम्प‚ २ जनाको मृत्यु
काठमाडौँ — इरानको उत्तर-पश्चिम क्षेत्रको खोय भन्ने स्थानलाई केन्द्रबिन्दु बनाएर ५.९ म्याग्निच्युडको शक्तिशाली भूकम्प गएको छ । भूकम्पमा परी २ जनाको मृत्यु भएको छ भने ३ सयभन्दा बढी मानिसहरू घाइते भएका छन् । भूकम्पबाट दर्जनौं घरहरू क्षतविक्षत भएको इरानको सरकारी समाचार संस्था आईआरनए न्युज एजेन्सीले जनाएको छ ।
स्थानीय समयअनुसार शनिबार राति पौने १० बजे गएको उक्त भूकम्पमा परी ३ सयभन्दा बढी मानिस घाइते भएको जनाइएको छ । उत्तर-पश्चिम इरानको पूर्वी क्षेत्र अजरबैजान प्रान्तको खोय सहरलाई केन्द्रबिन्दु बनाई भूकम्प गएको आईआरनए न्युज एजेन्सीले उल्लेख गरेको छ । यो टर्कीसँगको सीमाक्षेत्र नजिकै रहेको क्षेत्रसमेत हो ।
क्षतीको यकिन विवरण भने आइसकेको छैन । समाचार एजेन्सी एएफपीका अनुसार अजरबैजानका गभर्नर सादिक मोतमदिनको भनाइलाई उद्धृत गर्दै आईआरएनएले भूकम्पका कारण हालसम्म २ जनाको मृत्यु भएको र ५०० भन्दा धेरै मानिसहरू घाइते भएको उल्लेख गरेको छ ।
भूकम्पको झट्का इरानमा मात्रै नभएर टर्की‚ इराक‚ आर्मिनिया र अजरबैजानमा पनि महसुस गरिएको भूकम्पबारे जानकारी दिने युरोपेली-भूमध्यसागरीय केन्द्रले बताएको छ ।
प्रकाशित : माघ १५, २०७९ १२:४१
