भारतीय वायुसेनाका दुइटा विमान दुर्घटना
नयाँदिल्ली — भारतीय वायुसेनाका दुई वटा शक्तिशाली लडाकु विमान शनिबार दुर्घटनाग्रस्त भएका छन् । उक्त घटनामा एक जना पाइलटको मृत्यु भएको छ । दुई जना पाइलटको जीवितै उद्धार गरिएको छ ।
एयरफोर्सको सुखोई–३० र मिराज–२००० दुर्घटनामा परेको हो । दुईवटै विमानको क्षतिग्रस्त अवशेष ९० किलोमिटरको फरकमा भेटिएको छ । मध्यप्रदेशको मुरैना र राजस्थानको भरतपुरमा दुर्घटनाग्रस्त विमानका अवशेष खसेको पाइएको छ । केही मिडियाले तीव्र गतिमा रहेका उक्त दुवै विमान आकाशमा ठोक्किन पुग्दा दुर्घटना भएको लेखेका छन् । तर, त्यसको स्वतन्त्र पुष्टि भने भएको छैन ।
सुखोई विमानमा रहेका दुईजना पाइलट सुरक्षित छन् । तर मिराज विमानका पाइलटको निधन भएको छ । एयरफोर्सले विमान रुटिन ट्रेनिङ मिसनमा रहेका बेला दुर्घटनाग्रस्त भएको र दुर्घटनाको कारण पत्ता लगाउन जाँच थालिएको जनाएको छ ।
सुखोई रुसमा र मिराज फ्रान्समा बनेका लडाकु जहाज हुन् । दुवै अत्याधुनिक सुविधासम्पन्न विमान मानिन्छन् । बिहान साढे ५ बजे दुर्घटना भएको अनुमान गरिएको छ । दुवै विमान ग्वालियर एयर बेसबाट उडेका थिए ।