महारानी भिक्टोरियाको निधन- विश्व - कान्तिपुर समाचार
कान्तिपुर वेबसाईट
AdvertisementAdvertisement
आजकै दिन

महारानी भिक्टोरियाको निधन

कान्तिपुर संवाददाता

काठमाडौँ — सन् १९०१ मा आजकै दिन (जनवरी २२) बेलायती महारानी भिक्टोरियाको निधन भएको थियो । १८१९ को मे २४ मा जन्मिएकी एलेक्जेन्ड्रिया भिक्टोरिया १८३७ को जुन २० ग्रेट ब्रिटेन र आयरल्यान्डकी महारानी बनेकी थिइन् । 

बेलायतमा ६३ वर्ष २ सय १६ दिन महारानी बनेकी उनको शासनकाललाई ‘भिक्टोरिया युग’ ले चिनिन्छ । यो युगमा बेलायतमा औद्योगिक, राजनीतिक, वैज्ञानिक, सैन्य क्षेत्रमा व्यापक परिवर्तन हुनुका साथै बेलायती साम्राज्य सबैभन्दा बढी बिस्तार भएको थियो । उनको शासनकालमा भारत, अस्ट्रेलिया, क्यानडा, न्युजिल्यान्ड, दक्षिण

अफ्रिका गरी विश्वको करिब २० प्रतिशत भूभाग बेलायतअन्तर्गत थियो । उनलाई सन् १८७६ मा बेलायती संसद्ले मतदानमार्फत ‘इम्प्रेस अफ इन्डिया’ समेत घोषित गरेको थियो ।

संवैधानिक राजसंस्थाकी प्रमुख भए पनि उनले मन्त्रिपरिषद्मा नियुक्ति तथा सरकारी नीति प्रभावित पार्ने गर्थिन् । व्यक्तिगत नैतिक मापदण्डका कारण उनी देशभर निकै चर्चित थिइन् । बेलायती राजा/महारानीमध्ये उनी रेल चढ्ने पहिलो हुन् । भिक्टोरियाले १९४० मा राजकुमार अल्बर्टसँग विवाह गरेकी थिइन् । १९६१ मा अल्बर्टको मृत्युपछि गहिरो शोकमा परेकी भिक्टोरिया केही समय सार्वजनिक कार्यक्रमहरूमा देखिन छाडेकी थिइन् ।

तर पछि राजकाजमा पुनः क्रियाशील भएकी भिक्टोरियाका स्वर्ण तथा हिरक जयन्तीहरूमा अभूतपूर्व उत्सव तथा उपस्थिति हुने गर्थ्यो । भिक्टोरियाको १९०१ मा ८१ वर्षको उमेरमा निमोनियाका कारण निधन भएको हो । उनको मृत्युपछि बेलायतमा एडवार्ड सातौं राजा भएका थिए ।

प्रकाशित : माघ ८, २०७९ ०७:५९
प्रतिक्रिया
पठाउनुहोस्

मुगुको छायानाथरारामा अन्तरजातीय विवाह गर्नेलाई १ लाख पुरस्कार

कान्तिपुर संवाददाता

मुगु — छायानाथरारा नगरपालिकाले अन्तरजातीय विवाह गर्ने जोडीलाई प्रोत्साहनबापत १ लाख पुरस्कार दिने निर्णय गरेको छ । नगरपालिकाको १२ औं नगर कार्यपालिका बैठकले जातीय विभेद कम गर्न यो निर्णय गरेको हो ।

कार्यपालिका बैठकले दलित हकअधिकारका लागि नीति–२०७९ पारित गर्दै उमेर पुगेका युवायुवतीले अन्तरजातीय विवाह गरे प्रोत्साहनस्वरूप पुरस्कार दिने घोषणा गरेको हो । जातीय विभेद अन्त्य गरी पिछडिएका दलित वर्गको हकअधिकार सुनिश्चित गर्न नीति पारित गरिएको नगरप्रमुख विष्णुकुमार भामले बताए ।

‘यसले उमेर पुगेर मात्र विवाह गर्न र अन्तरजातीय विवाह गर्न प्रोत्साहित गरेको छ,’ उनले भने, ‘हामीले जातीय समानता ल्याउन पनि यो निर्णय गरेका हौं ।’ नगरप्रमुख भामले नगरपालिकामा बसोबास गर्ने करिब १३ सय दलित घरधुरीलाई आयआर्जन तथा सीपमूलक तालिम सञ्चालनका लागि नगरले विभिन्न एक दर्जन योजना पनि अघि सारेको बताए । ‘अन्तरजातीय विवाह गरेकै आधारमा युवायुवती घरपरिवारबाट विस्थापित हुनुपरेको छ,’ उनले भने, ‘उनीहरू सामाजिक रूपमा अझै अपमान सहन बाध्य छन्, यो अवस्थाको अन्त्य गर्न पनि प्रोत्साहनको कार्यक्रम अघि सारिएको हो ।’

नगरले पारित गरेको निर्णय स्वागतयोग्य भएको दलित अधिकारकर्मीको भनाइ छ । यो निर्णय कागजमा मात्र नभएर व्यवहारमा लागू गर्न जरुरी रहेको अधिकारकर्मी जर्मन नेपालीले बताए । उनका अनुसार जिल्लामा झन्डै ५ प्रतिशत अन्तरजातीय विवाह हुने गरेको छ । ‘यो निर्णयले जातीय सद्भाव कायम गर्नेछ भने अन्तरजातीय विवाह गर्नेलाई जीविकोपार्जनमा सानै भए पनि सहयोग गर्नेछ,’ उनले भने, ‘आपसी सहअस्तित्व र सम्मान पनि बढाएको छ ।’

१२ औं विधेयक नगरसभाबाट ११ वटा ऐन तथा कार्यविधि पनि पारित गरिएको नगरपालिकाले जनाएको छ । पालिकाले आपत्कालीन विपत् व्यवस्थापन, स्थानीय विपत् न्यूनीकरण, जलवायु उत्थानशील, खानेपानी तथा सरसफाइ, व्यवसाय दर्ता, नगर बस सञ्चालन ऐन र कार्यविधि पारित गरेको हो ।

प्रकाशित : माघ ८, २०७९ ०७:५८
पूरा पढ्नुहोस्
प्रतिक्रिया
पठाउनुहोस्
×