अमेरिकामा हिमआँधीबाट ज्यान गुमाउने ६२ जना

उत्तर अमेरिकामा एक सातायताको घातक हिमआँधीका कारण जनजीवन निकै प्रभावित भएको अधिकारीहरूले जनाएका छन् । अमेरिका र क्यानडाका अधिकांश क्षेत्रमा फैलिएको आँधीका कारण हजारौं मानिसहरू बिजुलीबिना नै बाँच्न बाध्य भएका अमेरिकी सञ्चार माध्यमहरूले जनाएका छन् ।

इरी काउन्टीमा पर्ने बफेलो सहरमा मात्रै ज्यान गुमाउनेको संख्या २८ पुगेको छ । मृतकमध्ये केहीको हिउँ हटाउने क्रममा हृदयाघात भएर ज्यान गएको अधिकारीहरूले जनाएका छन् । घर वरपर जमेको हिउँ सावेलले हटाउँदा ढाड दुख्ने र हृदयाघात हुन सक्ने भन्दै बफेलो सहरमा सूचनासमेत जारी गरिएको छ ।

क्रिसमसको समयमा हिउँमा फसेको र अलपत्र परेको घटना जीवनमा कहिल्यै बिर्सन नसक्ने कतिपयको भनाइ छ । आँधीका कारण अमेरिका ओहायो, मिजोरी, विस्कन्सिन, कान्सस र कोलोराडोमा पनि मानिसहरूको ज्यान गएको छ । छिमेकी देश क्यानडाका ओन्टारियो, कुबेक र ब्रिटिस कोलम्बिया राज्यमा पनि केही मानिसले ज्यान गुमाएका जनाइएको छ ।

न्युयोर्कको इरी काउन्टीका अधिकारीहरूले खोजी र उद्धार कार्य जारी रहेको र ज्यान गुमाउनेको संख्या अझै बढी हुन सक्ने बताएका छन् । ‘सबै संख्या अझै समेटिएको जस्तो देखिँदैन,’ बफेलो सहरका मेयर बाइरोन ब्राउनले भने, ‘हामीलाई लाग्छ, इरी काउन्टीमा ज्यान गुमाउनेको संख्या बढी छ ।’ आँधीपछि करिब ५ हजार मानिसहरू उक्त क्षेत्रमा बिजुलीबिना नै बसेको ब्राउनको भनाइ छ ।

‘धेरैजसो स्थानीयले देखेको यो जीवनकालकै सबैभन्दा खराब अवस्था हो । हिमआँधी उत्कर्षमा रहेका बेला विद्युत् आपूर्ति बन्द भएपछि त्यहाँ २० हजारभन्दा बढी मानिस चिसोमा बस्न बाध्य भएका थिए ।

भारी हिमपातसँगै सवारीसाधन चलाउन प्रतिबन्ध गरिएको बफेलो सहरमा ट्राफिक व्यवस्थापन गर्नका लागि सैनिक प्रहरी खटाइएको अधिकारीहरूलाई उल्लेख गर्दै बीबीसीले जनाएको छ । सहरमा आपत्कालीन अवस्थाको घोषणा गरिएसँगै कतिपय स्थानमा लुटपाट भएको जनाइएको छ ।

बफेलो सहरका प्रहरी आयुक्त जोसेफ ग्राग्मलियाले केही स्थानमा लुटपाट भएको र ४ जना पक्राउ परिसकेका जनाएका छन् । ‘उनीहरू खाना तथा औषधि चोर्नेहरू होइनन् । उनीहरूले टीभी, सोफा र जे भेटिन्छ त्यही चोरिरहेका छन् । पसलहरूमा क्षति पुर्‍याएका छन् । तिनीहरू अवसरवादी हुन्,’ उनले भने ।

हिमपात कम भएसँगै अधिकारीहरूले गाडीहरू हटाउन र बिजुली पुनः सञ्चालन गर्न सक्दा सहरको अवस्थामा सुधार भएको ब्राउनले बताए । तर उक्त क्षेत्रमा तापक्रम बढ्दा त्यसले हिउा पग्लिएर बाढीजस्ता थप समस्याहरू आउनसक्ने भन्दै अधिकारीहरूले चेतावनी दिएका छन् ।

हिमआँधीका कारण हजारौं उडानहरू रद्द भएका छन् । मंगलबार बिहान मात्रै ४ हजार ८ सय उडानहरू रद्द भएका छन् । जसका कारण देशभरका विमानस्थलमा हजारौं यात्रुहरू अलपत्र परेका छन् । एक सातापछि मंगलबार कम हिमपात भएको र मौसम केहि न्यानो भएको जनाइएको छ । जसका कारण सर्वसाधारणहरू मौसममा केही सुधार आउने अपेक्षामा रहेका छन् ।

हिमआँधीले सर्वसाधारणको दैनिकी निकै प्रभावित भएपछि अमेरिकी राष्ट्रपति जो बाइडेनले न्यूयोर्क राज्यका लागि संघीय सहयोग दिने एउटा आपत्कालीन घोषणा अनुमोदन गरेका छन् । ‘बिदा मनाउने समयमा आफन्त गुमाउनेहरू प्रति मेरो सहानुभूति छ,’ बाइडेनले ट्वीटरमा लेखेका छन् । छिमेकी राज्य न्युजर्सीले पनि न्युयोर्कका लागि आपत्कालीन सामग्रीसहितको सेवा प्रदान गरेको छ ।