बेलायतमा नर्सहरूको हालसम्मकै ठूलो हडताल

१९ प्रतिशत तलब वृद्धिको माग गर्दै उनीहरूले हडताल गर्दा बिहीबार हजारौं बिरामी प्रभावित भएका बेलायती अखबारहरुले उल्लेख गरेका छन् । यसअघि आरसीएसनले सरकारले प्रस्ताव गरेको वार्षिक १४ सय पाउन्ड (करिब ४.३ प्रतिशत) तलब वृद्धि अस्वीकार गरेको थियो । नर्सहरुको युनियन ‘रोयल कलेज अफ नर्सिङ’ (आरसीएसन) को आह्वानमा त्यसमा आवद्ध झण्डै एक लाख नर्स हडतालमा उत्रिंदा अस्पताल सेवा प्रभावित बन्यो ।

केमोथेरापी र डायलसिस गर्नुपर्ने बिरामी, गर्भवती महिला, बालबालिका, इन्टेन्सिभ केयरजस्ता अत्यावश्यक सेवाबाहेक विभागमा कार्यरत नर्स हडतालमा उत्रिएका हुन् । आउँदो मंगलबार पनि १२ घण्टे हडताल आह्वान गरिएको छ । आफ्ना माग बेवास्ता गरिए आउँदो महिना अझ लामो हडताल गर्ने उनीहरूले चेतावनी दिएका छन् । ब्रिटिस स्वास्थ्यमन्त्री स्टिभ बार्कलेले सरकारमाथि अरु कैयौं आर्थिक दबाब परि रहेकाले सरकारले नर्सिङ युनियनहरूले मागे जति तलब वृद्धि गर्न नसक्ने बताएका छन् ।

रोयल कलेज अफ नर्सिङकी अध्यक्ष प्याट कलेनले खाली रहेका हजारौं नर्सिङ पदहरु पूरा गर्न माग गरिन् । ‘नर्स र बिरामीहरूका लागि यो दुखद् दिन हो,’ उनले भनिन् । तर, स्कटल्यान्डको राज्य सरकारले नर्सहरुको तलबमा ७५ प्रतिशत वृद्धि गर्न सहमत भए पछि त्यहाँ नर्सहरुले घोषणा गरेको हडताल फिर्ता लिएका थिए ।

बेलायतको राष्ट्रिय स्वास्थ्य सेवा (एनएचएस) अन्तर्गत नर्स हरुको झन्डै ४७ हजार पद रिक्त रहेको बताइएको छ । नेप्लिज नर्सिङ एसोसिएसन यूके अध्यक्ष सुनिता गौतमले नर्सहरुलाई कामको चाप ज्यादा तर तलब, सेवासुविधा न्यून भएपछि हडतालमा उत्रनु स्वाभाविक भएको बताइन् । ‘कोभिड महामारीका बेला हामीले ज्यानको बाजी लगाएर काम गर्‍यौं । अन्यत्र सबैतिर ज्याला बढ्यो तर हामीलाई हेरिएन’, गौतमले कान्तिपुरसँग भनिन् । अध्यक्ष गौतमले बेलायतमा कार्यरत नेपाली नर्सहरुको संख्या कम्तीमा दुई हजार रहेको बताइन् ।

उता, लन्डन इलिङ अस्पतालको क्रिटिकल केयर युनिटमा कार्यरत नर्स स्पेसलिस्ट प्रसुना कँडेलको गुनासो पनि समान छ । अहिले नर्सहरुले दिनमा १४ घण्टासम्म काम गर्नु परेको यथार्थ सुनाइन् । ‘कामको भारले गर्दा नर्सहरु धेरै बिरामी भइरहेका छन् । यो जागिर छाड्ने क्रम पनि बढिरहेको छ,’ कँडेलले भनिन्, ‘कम्तीमा तलब चित्तबुझ्दो भइदिए पनि काम गर्ने वातावरण बन्थ्यो । अहिलेको महँगीमा धेरै नर्सहरुलाई बाँच्न पनि कठिन भएको अवस्था छ ।’

बेलायत सरकारले हालै नेपाल सरकारसँग नेपाली नर्सहरु एनएचएसमा भर्ती गर्न सम्झौता गरेको छ ।