युरोपमा बढ्यो दाउराको माग 

रुसी ग्यास कटौतीसँगै जाडोयाममा आफ्ना घर तताउन ग्यास र बिजुलीको संकट हुने भयले माग अकासिएको हो । युरोपेली संघ (ईयू) ले जाडोयाममा संकट टार्न ऊर्जा प्रयोगमा १५ प्रतिशत कटौती गर्नुपर्ने चेतावनी दिएको छ । जसका कारण युरोपेलीहरूले काठमा लगानी गरिरहेका हुन् । वैकल्पिक ऊर्जा आपूर्ति खोजिरहेका बेला अस्ट्रियन चेम्बर अफ कमर्सले दाउराको माग तीव्र रूपमा बढ्दै गएको उल्लेख गरेको छ ।

अस्ट्रियामा पानी र घर तताउन गत सालबाट नै काठको माग ३८ प्रतिशतले बढेको छ । रुसी ग्यासको आपूर्ति बन्द भएपछि माग वृद्धि भएको अस्ट्रियन च्याम्बर अफ कमर्सले जनाएको छ । चेक गणतन्त्रमा बिजुलीको बिल सबैभन्दा धेरै बढेपछि दाउरामा आकर्षित भएको बताइएको छ । जुलाई २०२२ को घरेलु ऊर्जा मूल्य सूचकांकले क्रयशक्तिअनुसार समान तरिकाले समायोजन गर्दा चेक गणतन्त्रमा नागरिकले बिजुलीका लागि सबैभन्दा बढी तिरेका छन् । बढ्दो ऊर्जा बिलहरू तिर्न कठिन हुन लागेकाले पनि धेरै संख्यामा युरोपेलीहरू यस जाडोमा घर तताउन दाउरातिर फर्किरहेका छन् ।

फ्रान्समा दाउराको माग जाडो नलाग्दै ३३ प्रतिशतले बढिसकेको थियो । माग अत्यधिक बढ्दै गएपछि गोदामघरहरूले अर्को सालका लागि माग गरेको काठ पनि मगाइसकेको मेडियाहरूले उल्लेख गरेका छन् । दाउराको माग बढ्दै जाँदा वातावरणवादीहरूले प्रकृति विनाशको संकेत भन्दै चिन्ता व्यक्त गरेका छन् । दाउराको अभाव बढ्दै जाँदा निजी र सरकारी वन विनाश हुन सक्ने चिन्ता व्यक्त गरिएको छ । ऊर्जा संकटलाई उल्लेख गर्दै पोल्यान्डको सत्तारूढ दलका प्रमुख, जारोस्लाब काक्जिन्स्कीले मानिसहरूले टायर, प्लास्टिक र त्यस्तै हानिकारकबाहेक सबै चिज जलाउनुपर्ने बताएका छन् । हंगेरीमा दाउराको माग तीव्र बन्दै गएपछि त्यहाँको सरकारले काठका गोलाई बोक्ने प्यालेट निर्यातमा प्रतिबन्ध र सरकारी वनमा काठदाउरा खोज्न प्रतिबन्ध लगाएको छ ।

फ्रंस–२४ का अनुसार काठका टुक्राहरूको मूल्य फ्रान्समा लगभग दोब्बरले बढेर प्रतिटन ६ सय युरो पुगेको छ । बुल्गेरियामा दाउराको मूल्य दोब्बरले बढेर एकसय युरो प्रतिघनमिटर पुगेको छ । पोल्यान्डमा दाउराको मूल्य दोब्बर भएको जनाइएको छ ।

युरोपमा अत्यधिक काठ भित्रिएपछि गत जुलाई महिनामा ईयूले रुसी काठ र टुक्राको आयातमा प्रतिबन्ध लगाएको थियो । तर ईयूको यो प्रतिबन्धले काठदाउरा प्रयोग गर्ने न्यूनस्तरका नागरिकहरूलाई मारमा पार्ने भन्दै अभियानकर्ताहरूले विरोध गरेका छन् । जर्मनीमा दाउरा र कोइलाको मागमा उच्च वृद्धि भएपछि केही नक्कली अनलाइन स्टोरहरूले काठदाउराको दसौं गुणा मूल्य बढाएर बिक्री गरिरहेको भन्दै जर्मन प्रहरीले त्यसलाई ‘घोटालाको विपत्ति’ भनेको छ ।

युरोपियन कन्फेडेरेसन अफ द वुड वर्किङ इन्डस्ट्रिज र युरोपियन अर्गनाइजेसन अफ द समिल इन्डस्ट्रिजले उर्जा संकटपछि काठ नपाउँदा कतिपय उद्योग संकटमा परेका छन् । वुडवर्किङ उद्योगका अनुसार ऊर्जाको मूल्य बढ्न जाँदा काठको मूल्य कम्तीमा दोब्बर हुनुका साथै अन्य लागतहरू पनि बढेको छन् । केही वैज्ञानिक र वातावरणीय संरक्षण कार्यकर्ताहरूले लामो समयदेखि काठ जलाउँदा कोइला जलाउनेभन्दा प्रतिएकाइ ऊर्जाले बढी कार्बन प्रदूषण गराउने बताउँदै आएका छन् ।