इरानी महिला अमिनीको मृत्युको विरोधमा युरोपभर प्रदर्शन

इरानमा आमिनीको मृत्युको विरोधमा भैरहेको प्रदर्शनको समर्थनमा पेरिस र फ्रान्सका करिब एक दर्जन सहरमा भेला भएका मानिसहरूले विरोध गरेको फ्रान्सेली मिडियाहरूले लेखेका छन् ।

पेरिसमा ‘महिला, जीवन, स्वतन्त्रता’ जस्ता नारा लगाएर इरानी झन्डा र प्लेकार्डहरू फहराउँदै प्रदर्शनकारीहरूले पेरिसको द रिपब्लिकन चोकसम्म जुलुस निकालेका थिए ।

र्‍यालीमा सहभागीहरूले महिलामाथि हुने अत्याचारको अन्त्यसँगै इरानी जनताले वास्तविक स्वतन्त्रता चाहेको भन्दै नारा लगाएका थिए । फ्रान्सको तुलुज, मासेई, लियोंलगायत दर्जनौं सहरमा भएको विरोध प्रदर्शनमा प्रदर्शनकारीहरूले ‘महसा आमिनी’ लेखिएका प्लेकार्डहरू बोकेका थिए ।

उनीहरूले ‘हामीलाई इस्लामिक शासन चाहिँदैन । हामी दूराचारवादी शासन चाहँदैनौं । हामी लोकतान्त्रिक शासन चाहन्छौं । ईरानमा गणतन्त्र चाहिन्छ‚’ जस्ता नारा लगाएका थिए ।

त्यसैगरी, इटालीको रोम र मिलान सहरमा भेला भएका सयौं प्रदर्शनकारीले इरानको सरकार र केही दिनदेखिको प्रदर्शनमा भएको भड्किएको हिंसा र दमनविरुद्ध प्रदर्शन गरेका थिए । त्यहाँ पनि प्रदर्शनकारीहरूले महसा अमिनीको तस्बिर बोकेका थिए । सान् जियोभन्नी स्क्वायरमा भेला भएका उनीहरूले ‘ नारी, जीवन, स्वतन्त्रता’ को नारा लगाएका थिए ।

शनिबार स्विट्जरल्यान्डको जेनेभा, बेलायतको लन्डन, स्विडेनको स्टकहोमलगायत दर्जनौं सहरमा विरोध प्रदर्शन गरिएको फ्रान्सेली मिडियाहरूले उल्लेख गरेका छन् ।

सेप्टेम्बर १६ मा महसा अमिनीको प्रहरी हिरासतमा मृत्यु भएपछि भएको प्रदर्शनले इस्लामिक गणतन्त्रलाई एक महिनाभन्दा लामो समयदेखि आन्दोलित बनाइरहेको छ । मध्यपूर्वमा सुरु भएको प्रदर्शन बिस्तारै युरोपलगायत विश्वका अन्य भूभागमा पनि फैलिँदै गएको छ ।

महिलाका लागि देशले तोकिएको कडा इस्लामिक पोसाक कोडको उल्लङ्घन गरेको आरोपमा हिरासतमा राखिएको तीन दिनपछि अमिनीको मृत्यु भएको थियो । त्यसपछि आन्दोलन चर्किंदै गएको छ ।