रुस-युरोप ग्यास पाइपलाइनमा चुहावट- विश्व - कान्तिपुर समाचार
कान्तिपुर वेबसाईट
AdvertisementAdvertisement

रुस-युरोप ग्यास पाइपलाइनमा चुहावट

एजेन्सीहरू

बर्लिन — रुसबाट युरोपसम्म आपूर्ति हुने २ वटा प्राकृतिक ग्यास पाइपलाइनमा चुहावट भएको छ । रुसी बन्दरगाह शहर सेन्ट पिटर्सबर्गबाट नर्ड स्ट्रिम–१ र नर्ड स्ट्रिम–२ गरी दुई वटा पाइपलाइन प्रणालीमार्फत जर्मनीसम्म ग्यास आपूर्ति हुन्छ । बाल्टिक समुद्र हुँदै जाने करिब १२ सय किलोमिटर लामा ति पाइपलाइनका ३ स्थानमा चुहावट भएको हो ।

नर्ड स्ट्रिम–१ मा सोमबारदेखि दुई फरक स्थानबाट ग्यास चुहावट भइरहेको छ । मंगलबार नर्ड स्ट्रिम–२ पाइपलाइनबाट पनि ग्यास चुहावट भई समुद्रमा भुल्काहरू देखिएको डेनिस अधिकारीहरूले जनाएका छन् । उक्त स्थान डेनमार्कको बोर्नहमस्थित तटीय क्षेत्रनजिक पर्छ । ‘समुद्रमा उठेको ग्यासको भुल्का हेर्दा पाइपलाइनमा ठूलो प्वाल परेको हुने आकलन गर्न सकिन्छ,’ डेनिस विद्युत् प्राधिकरण प्रमुखले रोयटर्ससँगको कुराकानीमा भनेका छन्, ‘चुहावट केही दिन या सातासम्मै हुनसक्छ ।’

रुसले बनाएका यी दुवै पाइपलाइन प्रणाली अहिले चालु अवस्थामा छैनन् । नर्ड स्ट्रिम–१ अन्तर्गत पनि दुई वटा समानन्तर पाइपलाइन छन् । मर्मतका लागि भन्दै गत अगस्टदेखि रुसले यी पाइपलाइन बन्द गरेको छ । तर, दुवै पाइपलाइनमा ग्यास भने रहेको बताइएको छ ।

नर्ड स्ट्रिम–२ का सञ्चालकले सोमबार अपराह्न नै पाइपलाइनमा ग्यासको दबाब घटेको सूचना जारी गरेका थिए । त्यसको केही घण्टापछि नै ग्यास चुहावट भएको खबर बाहिरिएको हो । उक्त सूचनापछि डेनिस अधिकारीहरूले बोर्नहमको तटीय क्षेत्रमा रहेका पानीजहाजहरूलाई सतर्कता अपनाउन भनेका थिए । चुहावट भएको क्षेत्रबाट ५ नटिकल माइल वरपर पानीजहाज लैजान निषेध नै गरिएको छ ।

ग्यास चुहावटको कारण भने हालसम्म खुलेको छैन । पाइपलाइन सञ्चालन गर्दै आएको कम्पनी नर्ड स्ट्रिम एजीले समुद्रमुनि पाइपलाइनमा एकैदिनमा अभूतपूर्व क्षति भएको जनाएको छ । कम्पनीले दुवै पाइपलाइन प्रणालीलाई पुनः यथास्थितिमै सञ्चालन गर्न कति समय लाग्छ भन्ने यकिन नभएको पनि स्पष्ट पारेको छ । चुहावटबारे जर्मन, डेनिस र स्विडिस अधिकारीहरूले पनि छानबिन थालेका छन् ।

रुस–युक्रेन युद्ध सुरु भएपछि रुस र युरोपबिच चुलिएको ऊर्जा संघर्षमा यी दुवै पाइपलाइन केन्द्रविन्दुमा छन् । युक्रेनमाथि युद्ध छेडेसँगै त्यसको विरोधमा पश्चिमा राष्ट्रहरूले रुसमाथि विभिन्न प्रतिबन्ध लगाएका छन् । जसको विरोधमा रुसले ‘ब्ल्याकमेल’ गर्दै युरोपमा ग्यास आपूर्ति कम गरेको युरोपेली संघले आरोप लगाएको थियो । उक्त आरोपको मस्कोले भने प्रतिवाद गर्दै आएको छ । हाल भएको ग्यास चुहावटलाई पनि रुसले पाइपलाइनमा तोडफोड गरी युरोपलाई तर्साउन खोजेको अपुष्ट स्रोत उल्लेख गर्दै जर्मन मिडियाहरुले दाबी गरेका छन् ।

डेनमार्ककी प्रधानमन्त्री मेटी फ्रेडेरिक्सनले भने तत्कालै कुनै निष्कर्षमा पुग्नु अति नै छिट्टो हुन जाने प्रतिक्रिया दिएकी छन् । तर, धेरै स्थानमा एकैसाथ चुहावट हुनुलाई संयोग मात्रै पनि मान्न नसकिने उनको भनाइ छ । क्रेमलिन प्रवक्ता दिमित्री पेस्कोभले घटनालाई लिएर गम्भीर ध्यानाकर्षण भएको बताएका छन् । यसबाट रुसले कुनै आक्रमण गर्नसक्ने सम्भावनालाई भने उनले खारेज गरिदिएका छन् ।

प्रकाशित : आश्विन १२, २०७९ ०८:०१
प्रतिक्रिया
पठाउनुहोस्

तरकारीमा विषादी घटाउँदै किसान

चन्द्र कार्की

तेह्रथुम — लालीगुराँस नगरपालिका–७ लसुनेमा बेमौसमी तरकारी खेती गरिहेका युवा साजन विश्वकर्मा दुई वर्षअघिसम्म तरकारी बालीमा हानिकारक विषादीको प्रयोग गर्थे । बेमौसमी तरकारी बालीमा लाग्ने रोगकिरा नियन्त्रणका लागि विश्वकर्मा प्रत्येक महिना मानव स्वास्थ्यका लागि अत्यन्त हानिकारक मानिएका कार्बोफ्युरान र बायोर ग्रुपका विषादी अन्धाधुन्ध प्रयोग गर्थे ।

यी विषादीको प्रयोगबाट तरकारी बालीमा देखा परेका रोग किरा त निर्मूल हुन्थे, तर विषादी प्रयोग गरेको तरकारीको सेवनले पुर्‍याउने असरबारे उनलाई जानकारी थिएन ।

विश्वकर्माले पछिल्ला दुई वर्षयता विषादीको प्रयोग बन्द नै गरेका छन् । विवादीको प्रयोग बन्द गरेपछि उत्पादन घटेको उनले दुखेसो पोखे । विश्वकर्मा जस्तै यस भेगका धेरै किसानले आफ्नो उत्पादन बढाउन र रोगकिरा नियन्त्रणका लागि सरकारले प्रतिबन्ध लगाएका डिडिटी, डाईअल्ड्रिन, लिन्डेन, लोरडाइन, फस्फामिडन्, क्लोरडेन लगायतका अत्यन्त हानिकारक विषादी प्रयोग गरिरहेका थिए ।

छोटो छोटो समयमा आफूले लगाएको तरकारी बालीमा यी विषादी प्रयोग गर्दा रोगकिराको समयमै निदान पनि हुन्थ्यो । तरकारीमा चमक आउँथ्यो र बजारमा समेत सजिलै बिक्री हुन्थ्यो । धेरै किसान तरकारी खेतीमा विषादी प्रयोगमै मख्ख थिए । तर विषादीको मन्द असर आफू र तरकारी बारीमा प्रत्यक्ष सम्पर्कमा आउने आफ्ना परीवारका सदस्यलाई पर्न थालेको महसुस गरेपछि यस भेगका धेरै किसानले विषादीको प्रयोगको मात्रा घटाएका छन् ।

अधिकांश किसानले विषादीको प्रयोग बन्द गरेका छन् । आफू र परिवारका सदस्यलाई छाला चिलाउने, शरीरमा फोका उठ्ने, रिंगटा लाग्ने, वाकवाकी लाग्ने, टाउको दुख्ने, ज्वरो आउनेलगायत रोगको लक्षण देखा परेको विषादी प्रयोग गरिरहेका किसानको भनाइ छ । किसानले बेमौसमी तरकारी बालीमा जथाभावी प्रयोग गरेको हानिकारक विषको असर थाहापाए पछि धेरै किसानले तरकारी बालीमा विषादीको प्रयोग त्याग्दै लगेको जिल्ला किसान सञ्जालका अध्यक्ष योगेन्द्र गढ्तौलाले बताए ।

विश्वकर्मा जस्तै यस भेगमा तरकारी खेती गरिहेका करिब ३० हजार वढी किसान तरकारी बालीमा लाग्ने रोगकिरा नियन्त्रणका लागि अहिले जैविक मल र विषादीतर्फ आकर्षित भएको सिंधुवा कृषि भण्डारका प्रमुख वजार व्यवस्थापक मेघेन्द्र गुरुङले वताए । तेह्रथुम, संखुवासभा र धनकुटाका ६ बढी स्थानीय तहका किसानले उत्पादन गर्दै आएको तरकारी भण्डारमार्फत पूर्वी तराई र भारतीय बजार तर्फ निर्यात हुने गरेको छ । विषादी प्रयोग गर्न पर्ने अवस्थामा मात्र मानव स्वास्थ्यमा असर नपुर्‍याउने खालका विषादी प्रयोग गर्न किसानलाई सुझाइरहेको गुरुङले बताए ।

तेह्रथुमसहित संखुवासभा र धनकुटाका किसानले बेमौसमी तरकारी खेती सुरु गरेकै समयदेखि विषादीको पनि प्रयोग गर्न थालेका थिए । स्थानीय कृषि सहकारी, कृषि भण्डार तथा संकलन केन्द्रको सहयोगमा किसानलाई विषादीले मानव स्वास्थ्यम पुर्‍याउने हानी बारेमा जानकारी गराउन थालेपछि प्रयोगको मात्रा पनि निकै घटेर गएको कृषि ज्ञान केन्द्रका प्रमुख भुवन बुढाथोकीले बताए । तरकारी बालीमा बिषादी प्रयोगको मात्रा न्यूनीकरण गर्न र जैविक विषादीको प्रयोग बढाउने उपायबारे सिकाउन कृषि प्राविधिकहरू किसानका खेतबारीमै पुगिरहेको प्रमुख बुढाथोकीको भनाइ छ ।

यहाँ उत्पादित तरकारी पूर्वी तराईका धरान, इटहरी, विराटनगर, झापा, नारायणघाट, काठमाडौंलगायतका बजारसम्म पुग्छ । विषादी प्रयोग भएको तरकारी सहकारी तथा अन्य व्यापारीले समेत खरिद गर्न छोडिदिएपछि किसानले बाध्य भएर तरकारी बालीमा विषादी प्रयोगको मात्रा घटाएका छन् । छथर गाउँपालिका अध्यक्ष सन्तवीर लिम्बूले मानव स्वास्थ्यका लागि हानिकारक मानिएका विषादी प्रयोग गरेर तरकारी उत्पादन गरेको भेटिए कारबाही गर्ने नीति गाउँपालिकाले ल्याएको बताए ।

प्रकाशित : आश्विन १२, २०७९ ०७:५५
पूरा पढ्नुहोस्
प्रतिक्रिया
पठाउनुहोस्
×