बर्सेनि १३ करोड टन खाद्यान्न खेर फाल्छ युरोप- विश्व - कान्तिपुर समाचार
कान्तिपुर वेबसाईट
AdvertisementAdvertisement

बर्सेनि १३ करोड टन खाद्यान्न खेर फाल्छ युरोप

ददि सापकोटा

पेरिस — युरोपेली संघ (ईयू) अन्तर्गतका राष्ट्रहरूले हरेक वर्ष १३ करोड टनभन्दा बढी खाना बर्बाद गर्ने गरेको तथ्य एक अध्ययनले देखाएको छ । सूर्यमुखी तेल, गहुँ र जौका लागि युक्रेनमा निर्भर रहेको युरोपले त्यहाँबाट निर्यात गरिएकोमध्ये आधा गहुँ खेर फाल्ने गरेको रिपोर्टमा उल्लेख छ ।

फिडब्याक ईयूले गरेको अध्ययनअनुसार खेतमा बाली लगाउँदा र उठाउँदा पनि खाद्यान्न बर्बाद गर्ने गरिन्छ । फार्ममा हुने बर्बादी रोक्न सकेको खण्डमा मात्रै पनि खाद्यान्नको बढ्दो लागत कम गर्न सकिन्ने सम्भावना छ ।

‘खाना बर्बाद गरेर फोहोरका रूपमा मिल्काउनु भनेको मानिसहरूका लागि थप खर्च बढाउनु हो । यो करिब १ अर्ब ४३ अर्ब बराबरको छ । खाद्यान्नको मूल्य बढेको समयमा खाद्य फोहोरले व्यवसाय र उपभोक्तालाई थप खर्च गराउँछ,’ फिडब्याक ईयूका वरिष्ठ नीति र अभियान प्रबन्धक मार्टिन बोम्यानले भनेका छन् । उनले जलवायु संकटबाट बच्न यो साँच्चै महत्त्वपूर्ण रहेको र ईयूको कम्तीमा ६ प्रतिशत उत्सर्जन खाद्य फोहोरबाट आउने बताएका छन् ।

‘र हामीलाई थाहा छ, जलवायु परिवर्तन पनि संकटको एक कारण हो,’ उनको भनाइ छ । रिपोर्टअनुसार ईयूमा मात्रै खेर जाने गहुँको मात्रा युक्रेनबाट निर्यात हुने परिमाणको करिब आधा र ईयूको अन्य अन्न निर्यातको एक चौथाइ बराबर हो । ‘उच्च खाद्यान्न मूल्यहरू र जीवनयापनको लागतको संकटको समयमा ईयूले सम्भावित रूपमा आयात गर्नेभन्दा बढी खाद्यान्न खेर गइरहेको छ जुन एक ठूलो घोटाला, काण्डजस्तै हो,’ मेचिलसेनले भनेका छन् । ईयूसँग अब जलवायु परिवर्तनसँग लड्न र खाद्य सुरक्षा सुधार गर्न २०३० सम्ममा आफ्नो खाद्यान्नको फोहोरलाई खेतबाट थालसम्म पुग्दा आधा घटाउन कानुनी रूपमा बाध्यकारी लक्ष्यहरू लागू गराउने ठूलो अवसर छ ।’

संयुक्त राष्ट्र खाद्य र कृषि संगठन (एफएओ) का अनुसार युक्रेन–रुस युद्धका कारण गत महिना विश्वव्यापी खाद्यान्न मूल्यहरू एक वर्षअघिको तुलनामा ८ प्रतिशतले बढेको थियो । गहुँ, मकै र भटमासको मूल्यले यस वर्ष २००८ को विश्व वित्तीय संकटका बेलाभन्दा पनि बढी उचाइ लिएको छ ।

ईयू खाद्य उत्पादनको अनुमानित २० प्रतिशत प्रत्येक वर्ष बर्बाद हुने गरेको छ । त्यसरी मिल्काइने खाद्यको लागत ईयू व्यवसायी र घरपरिवारहरूलाई प्रतिवर्ष १ खर्ब ४३ अर्ब लाग्ने गरेको छ । रिपोर्टले आगामी वर्ष मकै र गहुँको मूल्य क्रमश: ४.६ प्रतिशत र ७.२ प्रतिशतले बढ्ने अनुमान गरेको छ । ईयू राष्ट्रहरुमा सबैभन्दा बढी प्रयोग हुने खाद्यान्नमा गहुँ र मकै पर्छ ।

प्रकाशित : आश्विन ६, २०७९ २१:५३
प्रतिक्रिया
पठाउनुहोस्

दार्चुलामा जिप दुर्घटना, १ को मृत्यु

कान्तिपुर संवाददाता

दार्चुला — दार्चुलामा बिहीबार साँझ जिप दुर्घटना हुँदा १ जनाको मृत्यु भएको छ । लटिनाथबाट मकरिगाड जाँदै गरेको म १ ज २३३ नम्बरको जिप अपिहिमाल गाउँपालिका वडा नम्बर ५ तिम्लामा दुर्घटना भएको अपीहिमाल गाउँपालिका अध्यक्ष भगतसिंह ठेकरे बोहराले जानकारी दिए ।

उनका अनुसार अपिहिमाल ६ बस्ने अन्दाजी १८ वर्षका दिनेश धामीको घटनास्थलमै मृत्यु भएको हो ।

घटनास्थलबाट ५ जनाको उद्धार गरी मार्मा गाउँपालिकाको स्वास्थ्यचौकीमा लगिएको अध्यक्ष बोहराले जानकारी दिए ।

प्रकाशित : आश्विन ६, २०७९ २१:४५
पूरा पढ्नुहोस्
प्रतिक्रिया
पठाउनुहोस्
x
×