अस्ट्रेलियामा दुर्घटना, ५ बालबालिकाको मृत्यु

सिड्नीबाट करिब एक सय किलोमिटरको दूरीमा रहेको बक्सन भन्ने स्थानमा मंगलबार साँझ एक कार दुर्घटना भएको हो ।

दुर्घटनामा १४ वर्षका दुई बालिका र १५ वर्षकी एक बालिकाको मृत्यु भएको छ भने १५ र १६ वर्षका दुई बालकले समेत दुर्घटनामा ज्यान गुमाएका छन् ।

६ जना सवार कार रातिको करिब ८ बजे एउटा रुखमा ठोक्किएको प्रहरीलाई उद्धृत गर्दै द गार्जिएनले जनाएको छ । दुर्घटनामा सवारी चालक १८ वर्षका एक युवक भने घाइते भएका छन् । उनको स्थानीय अस्पतालमा उपचार भइरहेको जनाइएको छ ।

प्रहरीले दुर्घटनाको थप अनुसन्धान गरिरहेको जनाएको छ । मृतक सबै स्थानीय पिक्टन हाइस्कुलमा अध्ययनरत रहेका थिए ।

घटनास्थलको छानबिनका लागि प्रहरीको अनुसन्धान टोली पुगिसकेको छ भने विद्यालयका शिक्षक तथा विद्यार्थीलाई आवश्यक सहयोग उपलब्ध गराइएको एबीसीले जनाएको छ ।

घटनापछि राज्यका प्रिमियर डोमिनिक पेरोटेले विद्यालयमा पुगेर श्रद्धाञ्जली व्यक्त गरेका छन् भने प्रहरीले दुर्घटनाग्रस्त कार ४ जना यात्रुका लागि मात्र चलाउने मिल्ने भए पनि ६ जना सवार रहेको भन्दै अनुसन्धान गरिरहेको जनाएको छ ।