फ्रान्समा भएको दुर्घटनामा एक नेपालीको मृत्यु, एक जना सख्त घाइते- विश्व - कान्तिपुर समाचार
कान्तिपुर वेबसाईट
AdvertisementAdvertisement

फ्रान्समा भएको दुर्घटनामा एक नेपालीको मृत्यु, एक जना सख्त घाइते

कान्तिपुर संवाददाता

पेरिस — फ्रान्सको राजधानी पेरिसबाट करिब ९३२ किमी दक्षिणमा रहेको निस सहरको राजमार्गमा सवारी दुर्घटनामा एक नेपालीको मृत्यु हुनुका साथै अर्की एक महिला सख्त घाइते भएकी छन् ।


मृत्यु हुनेमा बरपिपल, भरतपुर, चितवनका महेन्द्र प्रसाद कँडेल हुन् भने घाइते हुनेमा नवलपुर, नवलपरासीकी लक्ष्मी न्यौपाने हुन् ।

पेरिसस्थित नेपाली दूतावासका अनुसार घाइते न्यौपानेको हाल निस सहरस्थित पास्टर-२ अस्पतालको डोर्माटोलोजी वेस्ट विभाग अन्तर्गत चौथो तल्लामा रहेको कोठा नम्बर ४०३३ मा उपचार भइरहेको छ ।

मृतकको शव भने उनका परिवारले नेपाल लैजान खोजेको र त्यसका लागि प्रक्रिया गरिने दूतावासले जनाएको छ । दुर्घटना गत जुलाई १७ तारिख आइतबार राति १२ बजेर ४० मिनेटमा भए पनि फ्रान्सको प्रहरीले अगस्ट ३ मा मात्रै पेरिसस्थित नेपाली दूतावासलाई सम्पर्क गरेको थियो ।

प्रहरीले सार्वजनिक गरेको सूचना अनुसार मृतक कँडेल र घाइते न्यौपाने फ्रान्स र इटालीको सीमा नजिकैको रोकब्रुन क्याप मार्टिन इन्टरचेन्ज र मेन्टन इन्टरचेन्जको बीचमा ए ८ राजमार्ग पार गर्ने क्रममा सवारी दुर्घटनामा परेका हुन् ।


दुर्घटना लगत्तै राजमार्ग करिब दुई घण्टा जाममा परेको निस सहरबाट प्रकाशित फ्रान्सब्ल्यु अखबारले उल्लेख गरेको छ ।

दुर्घटनामा पर्नेका आफन्तको भनाइमा न्यौपाने र कँडेलसँगै करिब १० जना नेपाली केही दिनअघि रोमानियाबाट हिँडेका थिए । उनीहरू रोमानियाभन्दा उत्तम विकल्पको खोजीमा त्यहाँबाट हिँडेका थिए।


केही दिनको प्रयासपछि निसस्थित पास्टर-२ अस्पतालमा उपचाररत लक्ष्मी न्यौपानेसँग पेरिसस्थित नेपाली दूतावासले सोमबार मध्याह्नमा सम्पर्क गर्दा उनले आफूहरू चार जनाको समूहले राति सडक पार गरेको बताएकी थिइन् ।

लक्ष्मी न्यौपानेका अनुसार उनका दुवै गोडा र ढाड भाँचिएका छन् । अस्पतालका कर्मचारीले भने न्यौपानेको शरीरका धेरै भागमा चोट लागेको छ र घाउ सन्चो हुने क्रम ढिलो भइरहेको छ ।


सोमबार दूतावाससितको सम्पर्कमा न्यौपानेले सडकमा कसैले धकेलिदिएको जस्तो आफूले अनुभव गरेको तर त्यसपछिको कुनै पनि अवस्थाका बारेमा जनकारी नभएको बताएकी छन् ।


फ्रान्सब्लु अखबारले नाम उल्लेख नगरिकन दुर्घटनामा पर्नेमध्ये एक जनाको घटनास्थलमै मृत्यु भएको र अर्को एक जनाको गम्भीर अवस्थामा उपचार भइरहेको उल्लेख गरेको छ ।


रातको समयमा राजमार्ग पार गर्ने क्रममा राति तीव्र गतिमा गुडेको गाडीले ठक्कर दिएको फ्रान्सेली प्रहरीको भनाइलाई उल्लेख गर्दै फ्रांन्सब्ल्यु अखबारले जनाएको छ । दुर्घटना लगत्तै प्रहरीले पीडितको पहिचान गर्न जाँचबुझ सुरु गरेको स्थानीय पत्रिकाले उल्लेख गरेको छ ।

प्रकाशित : श्रावण २३, २०७९ १९:३०
प्रतिक्रिया
पठाउनुहोस्

आईएमई जनरल इन्स्योरेन्सको सीईओमा पुन: युगेशभक्त

कान्तिपुर संवाददाता

काठमाडौँ — आईएमई जनरल इन्स्योरेन्सको प्रमुख कार्यकारी अधिकृत (सीईओ)मा पुन: युगेशभक्त बादे श्रेष्ठ नियुक्त भएका छन् । कम्पनीको संचालक समितिको १२०औं बैठकले साउन २३ गतेदेखि लागू हुने गरी दोस्रो कार्यकालको लागि पुन: नियुक्त गरेको हो ।

श्रेष्ठ २७ वर्षदेखि निर्जीवन बीमा क्षेत्रमा कार्यरत छन् । श्रेष्ठको नेतृत्वमै करिब ७ वर्षमा आईएमई जनरल इन्स्योरेन्सले उल्लेख्य प्रगति हासिल गर्न सफल भएको छ । कार्यकारी अधिकृतको सपथ लिँदै श्रेष्ठले आफ्नो कार्यकालमा आईएमई जनरल इन्स्योरेन्सलाई उत्कृष्ट कम्पनीको रुपमा स्थापित गर्ने प्रतिबद्धता व्यक्त गरे ।


प्रकाशित : श्रावण २३, २०७९ १९:१०
पूरा पढ्नुहोस्
प्रतिक्रिया
पठाउनुहोस्
x
×