चीनको सैन्य अभ्यास गैरजिम्मेवार : अमेरिका- विश्व - कान्तिपुर समाचार
ताइवान तनाव

चीनको सैन्य अभ्यास गैरजिम्मेवार : अमेरिका

ताइवानमा शान्ति र स्थिरता कायम राख्ने लक्ष्यमा जोखिम थपिएको अमेरिकाको दाबी
एजेन्सीहरू

वासिङ्टन/बेइजिङ — चीनले आफूमाथि आक्रमण गर्न सैन्य अभ्यास तीव्र पारेको ताइवानको भनाइपछि अमेरिकाले चीनको चर्को आलोचना गरेको छ । ‘चीनले गैरजिम्मेवार कार्य गरेको र उत्तेजना फैलाउन खोजेको’ अमेरिकाको आरोप छ ।

‘चिनियाँ सैनिक गतिविधिहरू यथास्थिति फेर्ने प्रयासमा गरिएको ठूलो घटना हो । गैरजिम्मेवार र उत्तेजनापूर्ण यस्ता कदमले जोखिम बढाउँछन्,’ अमेरिकी राष्ट्रपति कार्यालय ह्वाइटहाउसका प्रवक्ताले भनेका छन्, ‘यस्ता गतिविधि ताइवान स्ट्रेटमा शान्ति र स्थिरता कायम राख्ने लक्ष्यविपरीत छन् ।’

अमेरिकी सभामुख नान्सी पेलोसी नेतृत्वको अमेरिकी प्रतिनिधिमण्डलले गत साता ताइवानको भ्रमण गरेपछि अमेरिका र चीनबीच तनाव चुलिएको छ । चिनियाँ अधिकारीले ताइवान भ्रमण नगर्न पेलोसीलाई चेतावनी दिएका थिए । चीनले ताइवान आफ्नो छुट्टै राज्य भएको बताउने गर्छ । पेलोसीको भ्रमण ताइवान भ्रमणले ताइवानमाथिको आफ्नो स्वामित्वलाई चुनौती दिइएको चीनको बुझाइ छ ।

पेलोसीको भ्रमण सकिएलगत्तै चीनले ताइवान स्ट्रेटमा सैन्य अभ्यास सुरु गरेको हो । चीनले सैन्य अभ्यास सुरु गरेको आइतबार चौथो दिन हो । उक्त सैन्य अभ्यास हालसम्मकै ठूलो भएको बताइएको छ । ताइवानको रक्षा मन्त्रालयले चिनियाँ जहाज र विमानहरूले ताइवान स्ट्रेटमा विभिन्न गतिविधि गरेको जनाएको छ । तीमध्ये केहीले चीन र ताइवानबीच विद्यमान अनौपचारिक मध्यवर्ती रेखा नाघेका थिए ।

चीनले आफ्नो देशमाथि आक्रमण गर्न त्यसरी अभ्यास गरेको ताइवानी अधिकारीको भनाइ छ । आइतबारको अभ्यासमा सयभन्दा बढी लडाकु विमान र १० वटा सैन्य युद्धपोत सहभागी थिए । चिनियाँ सञ्चारमाध्यमका अनुसार अभ्यासका क्रममा एउटा क्षेप्यास्त्र सिधै ताइवानी टापुमाथि प्रहार गरिएको थियो । वास्तविक शस्त्रअस्त्रसहित गरिएको त्यस्तो अभ्यासको यथोचित जवाफ दिइएको ताइवानी सेनाको भनाइ छ । सैन्य विमान र युद्धपोतलाई चेतावनी दिन ताइवानले पनि आफ्ना लडाकु विमान उडाएको जनाएको छ ।

चीनले क्षेत्रीय स्थिरता भंग गर्न हठपूर्वक सैन्य अभ्यास गरेको ताइवानी प्रधानमन्त्री सु जन–चाङले आरोप लगाएका छन् । तर उनले चिनियाँ पक्षलाई संयमित हुन आग्रह गरेका छन् । चिनियाँ अधिकारीले भने सैन्य अभ्यासबारे हालसम्म कुनै टिप्पणी गरिसकेको छैन । शुक्रबार भने चिनियाँ विदेश मन्त्रालयका प्रवक्ता हुवा चुनइङले अमेरिकी विदेश नीतिको कडा आलोचना गरेका थिए । पेलोसीको ताइवान भ्रमणका कारण ताइवान स्ट्रेटको शान्ति र स्थिरतामा गम्भीर असर पुगेको चीनको भनाइ छ ।

लामो समयदेखि चीनको कडा आलोचकका रूपमा परिचय बनाएकी अमेरिकी सभामुख मंगलबार राति ताइवान पुगेकी थिइन् । साढे दुई दशकपछि ताइवान पुग्ने उनी वरिष्ठ अमेरिकी अधिकारी हुन् । भ्रमणका क्रममा उनले अमेरिकाले ताइवानको साथ नछाड्ने बताएकी थिइन् । ८२ वर्षीया पेलोसीले मानवाधिकारको अवस्थाबारे प्रश्न उठाउँदै चीनको आलोचना गर्दै आएकी छन् । त्यसका साथै मुस्लिम समुदायमाथि चीनले गरेको दमनको पनि पेलोसीले कडा आलोचना गर्दै आएकी छन् । यसअघि उनी सन् १९९१ मा अप्रत्याशित रूपमा बेइजिङ पुगेर तियानान्मेन स्क्वायर नरसंहारका पीडितको समर्थनमा आक्रमणस्थलमै पुगेर ब्यानर सार्वजनिक गरेकी थिइन् । उक्त कार्यपछि चिनियाँ अधिकारीहरू उनीसँग आक्रोशित भएका थिए ।

प्रकाशित : श्रावण २३, २०७९ ०७:३८
प्रतिक्रिया
पठाउनुहोस्

सिद्धार्थ राजमार्ग स्तरोन्नतिमा जोड

कान्तिपुर संवाददाता

पाल्पा — चार जिल्लाका १५ पालिकाका जनप्रतिनिधिहरूको भेलाले सिद्धार्थ राजमार्ग स्तरोन्नतिमा जोड दिएको छ । सिद्धार्थ आर्थिक करिडोर क्षेत्रको विकासका लागि पहिलो काम राजमार्ग स्तरोन्नति भएको भेलाले निष्कर्ष निकालेको हो ।

रूपन्देही, पाल्पा, स्याङ्जा र कास्कीबाट प्रमुख, उपप्रमुख र प्रमुख प्रशासकीय अधिकृतको भेला पोखरामा आयोजना गरिएको थियो । भेलाले ६ बुँदे साझा घोषणापत्र जारी गरेको छ । सार्वजनिक निजी साझेदारी मोडलबाट यस क्षेत्रको विकासमा स्थानीय तहको भूमिका पनि महत्त्वपूर्ण हुने भेलाको निष्कर्ष निकालेको छ ।

सिद्धार्थ आर्थिक करिडोरको मूल आधार सिद्धार्थ लोकमार्ग स्तरोन्नतिका लागि मापदण्ड अनुसार आवश्यक कार्यका लागि सम्बन्धित निकायहरूमा आवश्यक पहल र समन्वय गर्नुपर्ने पोखरा महानगरपालिकाका प्रमुख धनराज आचार्यले बताए । करिडोरअन्तर्गत पर्ने विभिन्न पालिकाहरूमा उत्पादन हुने कृषि उपजको व्यवसायीकरण, बजारीकरणको व्यवस्थापनमा जोड दिन पनि राजमार्गको स्तरोन्नति हुनुपर्ने उनले बताए । ‘पोखराबाट भारतको सुनौली बजारसम्म चार घण्टामा पुग्ने गरी सडक स्तरोन्नति हुनुपर्छ,’ उनले भने, ‘लुम्बिनी र पोखराका साथै पाल्पाको पर्यटन विकासलाई पनि जोड्न सकिन्छ ।’

तानसेनका नगर प्रमुख सन्तोषलाल श्रेष्ठले यस क्षेत्रको आर्थिक–सामाजिक समुन्नतिका लागि अन्तर–पालिका सहकार्य आवश्यक भएको बताए । सार्वजनिक निजी साझेदारीको मूल विषयवस्तुमा केन्द्रित भएर भेला सम्पन्न भएको बुटवल उपमहानगरका प्रमुख खेलराज पाण्डेयले बताए ।

प्रकाशित : श्रावण २३, २०७९ ०७:३१
पूरा पढ्नुहोस्
प्रतिक्रिया
पठाउनुहोस्
x
×