३ वर्षपछि अस्ट्रेलिया-चीन दोहोरो संवाद- विश्व - कान्तिपुर समाचार
कान्तिपुर वेबसाईट
AdvertisementAdvertisement

३ वर्षपछि अस्ट्रेलिया-चीन दोहोरो संवाद

चिसिएको सम्बन्ध सुधार हुने विश्वास, प्रतिद्वन्द्वीभन्दा साझेदारका रुपमा हेर्न अस्ट्रेलियालाई चीनको आग्रह 
नारायण खड्का

अस्ट्रेलिया — अस्ट्रेलिया र चीनबीच ३ वर्षपछि द्विदेशीय संवाद भएको छ । कोरोना महामारीको सुरुवातसँगै दुई मुलुकबीचको कूटनीतिक र व्यावसायिक सम्बन्धमा चिसोपना आएको थियो । गत शुक्रबार दुवै मुलुकका विदेशमन्त्रीले इन्डोनेसियाको बालीमा औपचारिक संवाद गरेका हुन् । जी–२० राष्ट्रहरूको बैठकमा सहभागी हुने क्रममा अस्ट्रेलियाली विदेशमन्त्री पेनी ओङ र चिनियाँ विदेशमन्त्री वाङ यीबीच भेटवार्ता भएको हो ।

अस्ट्रेलियामा हालै लेबर पार्टीको नयाँ सरकार गठन भएसँगै दुई मुलुकबीचको सम्बन्धमा केही सुधार आउने अपेक्षा गरिएको थियो । लामो समयदेखि बन्द रहेको संवादहीनताको क्रमलाई यो भेटवार्ताले भंग गर्नुका साथै सम्बन्ध सुधारमा यसलाई पहिलो सकारात्मक पाइलाका रूपमा विश्लेषण गरिएको छ । भेटपछि अस्ट्रेलियाका विदेशमन्त्री ओङले एक विज्ञप्ति जारी गर्दै दुई मुलुकबीचमा केही आपसी भिन्नता भए पनि भेटमा आफूहरूले एकआपसको प्राथमिकता र चासोलाई खुला रूपमा राखेको र ध्यानपूर्वक सुनेको बताएकी छन् ।

चीन अस्ट्रेलियाको सबैभन्दा ठूलो व्यावसायिक साझेदार मात्र नभएर अन्तर्राष्ट्रिय विद्यार्थी, बहुराष्ट्रिय कूटनीतिक गठजोडलगायत विषयमा समेत महत्त्वपूर्ण साझेदार मुलुकका रूपमा चिनिन्छ । कोरोना भाइरसको संक्रमण सुरु भएसँगै अस्ट्रेलियाका तत्कालीन प्रधानमन्त्री स्कट मरिसनले भाइरस उत्पत्तिका विषयमा छानबिन हुनुपर्ने माग उठाएपछि दुई मुलुकबीचको सम्बन्धमा चिसोपना सुरु भएको थियो ।

चीनको मोबाइल उत्पादक कम्पनी हुवावेलाई अस्ट्रेलियामा फाइभ–जी सेवा सञ्चालन गर्न नदिने निर्णय र अर्का प्रधानमन्त्री माल्कम टर्नबुलको पालामा विदेशी हस्तक्षेप रोक्न भन्दै परिमार्जन गरिएको कानुनलगायतले पनि चीन–अस्ट्रेलियाबीचको सम्बन्धमा तिक्तता ल्याउन भूमिका खेलेको थियो । सम्बन्धमा चिसोपना आएसँगै चीनले अस्ट्रेलियाबाट निर्यात हुने अर्बौं लागत बराबरको जौ, वाइन, मासुलगायतको निर्यातमा कडाइ तथा प्रतिबन्ध लगाएको थियो ।

सम्बन्धमा उतारचढावसँगै छलफलका लागि अस्ट्रेलियाले गरेको आग्रहलाई चीनले बेवास्ता गरेको थियो । अस्ट्रेलियाका तत्कालीन कृषिमन्त्री डेभिड लिटल प्राउड र व्यापारमन्त्री साइमन बर्मिङ्गमले छलफलका लागि गरेको आग्रहलाई चीनले नकारेको थियो । तर, पछिल्लो संसदीय निर्वाचनसँगै लेबर पार्टी सत्तामा पुगेपछि बधाई दिँदै चीनले सम्बन्ध सुधारमा प्रयास थालेको थियो । शुक्रबारको विदेशमन्त्रीस्तरीय छलफल सम्बन्ध सुधारमा महत्त्वपूर्ण र पहिलो कदम भएको विदेशमन्त्री ओङले बताएकी छन् । ओङका अनुसार छलफलका क्रममा चिनियाँ विदेशमन्त्री यीले चीनलाई प्रतिस्पर्धीभन्दा पनि साझेदारका रूपमा व्यवहार गर्न आग्रह गरेका छन् ।

सम्बन्ध सुधार्न चीनका ४ सर्त

यो भेटवार्तालाई चीनले पनि सकारात्मक कदमका रूपमा अर्थ्याएको छ । अस्ट्रेलियाले चीनलाई प्रतिद्वन्द्वी र शत्रुको व्यवहार गरेको गुनासो चीनको छ । दुई मुलुकबीचको सम्बन्धलाई लिएर अस्ट्रेलियाका कदम र प्रयोग गर्ने शब्दावलीसमेत गैरजिम्मेवार भएको उसको भनाइ छ । अस्ट्रेलियाले अवसरलाई उपयोग गर्ने, ठोस कार्य गर्ने, चीनलाई राम्ररी बुझ्ने र सकारात्मक ऊर्जा लिने विश्वास विदेशमन्त्री यीले विज्ञप्तिमार्फत गरेका छन् । सम्बन्ध सुधार गर्न भेटवार्तामा चिनियाँ विदेशमन्त्रीले अस्ट्रेलियासामु ४ सर्त अघि सारेका अस्ट्रेलियाली समाचार संस्था एबीसीले लेखेको छ ।

अस्ट्रेलियाले चीनलाई प्रतिद्वन्द्वीभन्दा साझेदारका रूपमा हेर्नुपर्ने, आफ्ना फरक धारणा र विचारलाई यथावत् राख्दै जे विषयमा आफूहरू समान बन्न सकिन्छ, त्यसैमा समानान्तर आधार खोज्नुपर्ने चीनको सर्त छ । कुनै तेस्रो पक्षलाई लक्षित नगर्ने वा कुनै तेस्रो पक्षद्वारा निर्देशित नहुने र व्यावहारिक र सकारात्मक सामाजिक तथा सार्वजनिक आधार निर्माणमा अडिग रहनुपर्नेमा पनि चीनले जोड दिएको समाचारमा उल्लेख छ ।

चीनको धारणा सार्वजनिक भएसँगै अस्ट्रेलियाका प्रधानमन्त्री एन्थोनी अल्बानिजीले अस्ट्रेलियाले कसैको मागलाई सम्बोधन नगर्ने प्रतिक्रिया दिएका छन् । उनले आफूहरूले आफ्नै राष्ट्रिय हितलाई प्राथमिकतामा राखेर सम्बोधन गर्ने स्पष्ट पारेका छन् । उनले आफूहरूले चीनलाई सकेजति सहयोग गर्ने र अन्य सबै मुलुकसँग राम्रो सम्बन्ध राख्ने बताउँदै सबैभन्दा पहिला अस्ट्रेलियाको हितका निम्ति उभिने बताएका छन् ।

उनले चिनियाँ विदेशमन्त्रीसँगको छलफललाई रचनात्मक कदम भएको उल्लेख गरेका छन् । अस्ट्रेलियाले कुनै पनि विषयमा आफ्नो धारणा परिवर्तन नगरेको जानकारी दिँदै उनले सधैं रचनात्मक रहने बताएका छन् ।

प्रकाशित : असार २९, २०७९ ०९:४३
प्रतिक्रिया
पठाउनुहोस्

अष्ट्रेलियाको सिड्नीमा भारी वर्षा र बाढी

एक जनाको मृत्यु । दसौं हजारलाई सुरक्षित स्थानमा सारिँदै ।
नारायण खड्का

अस्ट्रेलिया — केही दिनदेखि लगातार परेको वर्षाका कारण अस्ट्रेलियास्थित सिड्नीको जनजीवन प्रभावित बनेको छ । वर्षासँगै आएको बाढीमा परी अहिलेसम्म एक जनाको मृत्यु भइसकेको छ भने दसौं हजारलाई बासस्थान छोडेर सुरक्षित स्थानमा जान अधिकारीहरूले आदेश दिएका छन् ।


सिड्नीका दर्जनौं स्थानमा वर्षापछि आएको बाढीका कारण जनजीवन अस्तव्यस्त बनेको छ । न्यु साउथ वेल्स राज्यका प्रिमियर डोमिनिक पेरोटेले सोमबार आपतकालीन सेवामा खटिएका अधिकारीको आदेश सुन्न आग्रह गरेका छन् ।

उनले करिब ३२ हजार सर्वसाधारण अधिकारीद्वारा बाढीबाट सुरक्षित रहन जारी गरिएको आदेश तथा चेतावनीका कारण प्रभावित भएको जनाएका छन् । आपतकालीन सेवाका अधिकारीले सिड्नीका बाढी प्रभावित क्षेत्रका करिब ३० हजार जनतालाई सुरक्षित स्थानमा सर्नका लागि आग्रह गरेका छन् । राज्यको आपतकालीन सेवाकी कमिस्नर कारलिन योर्कले ७४ स्थानमा रहेका स्थानीयवासीलाई खाली गर्न दिइएको आदेश र ६२ स्थानका लागि जारी चेतावनी यथावत रहने बताएकी छन् ।

यहाँस्थित मौसम विभागले राज्यको केन्द्रीय तटीय क्षेत्रमा अझ भारी वर्षा र चर्को हावाहुरीको सम्भावना रहेको चेतावनी दिएको छ । बाढीका कारण आइतबार एक व्यक्तिको मृत्यु भएको छ ।

राज्यको होक्सबरी क्षेत्रमा रहेका स्थान धेरै प्रभावित बनेका छन् भने इलावरा, हन्टर र सिड्नीको सहरी क्षेत्रमा अझ भारी वर्षा हुनसक्ने विभागलाई उद्धृत गर्दै सञ्चारमाध्यमले जनाएका छन् । सोमबार राज्यका आपतकालीन व्यवस्थापन मन्त्री मुर्रे वाटले २ सय सुरक्षाकर्मी र दुईवटा हेलिकोप्टर सहयोगका लागि तयारी अवस्थामा राखिएको जनाएका छन् ।

उनले अहिल्यै रास्ट्रिय आपतकाल घोषणा गर्ने सम्भावना नरहे पनि राज्यस्तरमा भने आपतकाल घोषणा हुनसक्ने बताएको स्थानीय समाचारमा उल्लेख गरिएको छ । यसैगरी हङकङस्थित एक सिपिङ कम्पनीको हजारौं लिटर इन्धन लिएर आएको पानीजहाज सिड्नीस्थित रोयल नेसनल पार्क नजिकै इन्जिन बन्द भएका कारण रोकिएको समाचारमा जनाइएको छ ।

सिड्नीका तटीय क्षेत्रमा मंगलबारसम्म बाढी आउनसक्ने अनुमान मौसम विभागले गरेको छ । तर मंगलबारदेखि वर्षा कम हुने र अवस्थामा सुधार आउने अनुमन गरिएको छ । बाढीका कारण घर छोड्न बाध्य बनेका सर्वसाधारणलाई अधिकारीले अस्थायी बसोबासको व्यवस्था गरेका छन् । आपतकालीन सेवाका कर्मचारीले वर्षाका कारण समस्यामा परेका दर्जनौं स्थानीयवासीलाई उद्धार गरेका छन् ।

मंगलबारदेखि मौसममा सुधार हुने अपेक्षा गरिएको भए पनि अधिकारीले सर्वसधारणलाई आपतकालीन काममा खटिएका कर्मचारीको सुझाव मान्न आग्रह गरेका छन् ।

प्रकाशित : असार २०, २०७९ १७:५६
पूरा पढ्नुहोस्
प्रतिक्रिया
पठाउनुहोस्
x
×