प्रधानमन्त्री जोन्सनप्रति भरोसा नभएको बताउँदै बेलायती अर्थ र स्वास्थ्यमन्त्रीले दिए राजीनामा- विश्व - कान्तिपुर समाचार
कान्तिपुर वेबसाईट
AdvertisementAdvertisement

प्रधानमन्त्री जोन्सनप्रति भरोसा नभएको बताउँदै बेलायती अर्थ र स्वास्थ्यमन्त्रीले दिए राजीनामा

कान्तिपुर संवाददाता

काठमाडौँ — बेलायती प्रधानमन्त्री बोरिस जोन्सनको कार्यशैलीप्रति असन्तुष्टि व्यक्त गर्दै अर्थमन्त्री ऋषि सुनक र स्वास्थ्यमन्त्री साजिद जाविदले राजीनामा दिएका छन् । प्रधानमन्त्री जोन्सनप्रति भरोसा नभएको भन्दै दुवै मन्त्रीले राजीनामा दिएका हुन् ।

अर्थमन्त्री ऋषि सुनक र स्वास्थ्यमन्त्री साजिद जाविद ।

सरकारले गम्भीरतापूर्वक काम गरोस् भन्ने नागरिकको चाहना हुने सुनकले बताएका छन् । त्यस्तै जाविदले पनि राजीनामा पत्रमा सरकारले राष्ट्रहितमा काम नगरेको बताएका छन् । प्रधानमन्त्री जोन्सनले एउटा नियुक्तिबारे माफी मागेको केही बेरमा दुवै मन्त्रीले राजीनामा दिएका हुन् । प्रधानमन्त्री जोन्सनले सांसद क्रिस पिन्चरलाई उपसचेतक नियुक्त गरेकोमा गल्ती भएको भन्दै माफी मागेका हुन् ।

पिन्चरमाथि यौन दुराचारको आरोप लागेको छ । गत हप्तामात्रै कन्जरभेटिभ पार्टीले उनलाई सांसदबाट निलम्बित गरेको थियो । पिन्चरले भने आफूमाथि लाग्दै आएको आरोप निराधार भएको बताउँदै आएका छन् । उनीमाथि लागेको आरोप थाहा हुँदाहुँदै पनि नियुक्ति दिएको भन्दै प्रधानमन्त्री जोन्सनको कडा आलोचना भएको थियो । बीबीसीसागको अन्तर्वार्तामा प्रधानमन्त्री जोन्सनले सन् २०१९ मै पिन्चरमाथिको आरोपबारे जानकार रहेको स्वीकार गरेका छन् । केही आरोपहरू समाधान भएको भन्दै उनलाई नियुक्ति दिइनु एउटा गलत निर्णय भएको पनि उनले बताएका छन् ।

सन् २०२० को फेब्रुअरीदेखि सुनक अर्थमन्त्रीको जिम्मेवारीमा थिए । त्यस्तै सन् २०२१ देखि साजिद जाविद स्वास्थ्यमन्त्रीको जिम्मेवारीमा थिए । कन्जरभेटिभ पार्टीको भविष्यका नेताका रूपमा समेत हेरिएका सुनकले प्रधानमन्त्रीको कार्यशैली विरोधका लागि पर्याप्त रहेको बताएका छन् । अर्थमन्त्री भएपछि सुनकर र प्रधानमन्त्री जोन्सनबीच आर्थिक नीति तथा सार्वजनिक खर्चलाई लिएर मतभेद थियो । उनले सरकारबाट हट्नु पर्दा दु:खी भएको पनि बताएका छन् । उनले भनेका छन्, 'म तपाईंप्रति बफादार रहेको छु । पार्टीको नेता बनाउनमा मैले तपाईंलाई नै समर्थन गरेको हुँ; साथै अन्य विषयमा पनि साथ दिँदै आएको हुँ । अर्थमन्त्रीका रूपमा मैले तपाईंकै नेतृत्वमा जिम्मेवारी निर्वाह गरेको हुँ । सरकारबाट हट्नु पर्दा दु:खी छु तर अब बस्न निकै कठिन हुने निर्णयमा पुगेको हुँ ।'

प्रधानमन्त्री जोन्सनले यसअघि शिक्षामन्त्रीको भूमिकामा रहेका नादिम जहावीलाई अर्थमन्त्रीको जिम्मेवारी दिएका छन् । त्यस्तै मिसेल डोनेलनलाई शिक्षामन्त्रीको जिम्मेवारी दिएका छन् ।

प्रकाशित : असार २२, २०७९ ११:०६
प्रतिक्रिया
पठाउनुहोस्

खडेरीका कारण इटालीका ५ क्षेत्रमा आपत्काल घोषणा

ददि सापकोटा

पेरिस — इटालीले ७० वर्षयता सबैभन्दा खराब खडेरीका कारण खाध्यान्न संकट पर्ने भन्दै पाँच उत्तरी क्षेत्रमा आपत्काल घोषणा गरेको छ । इटालीले इमिलिया रोमान्यिया, फ्रियुली भेनेजिया ग्युलिया, लोमबार्डी पिएदोमो र भेनेतो  क्षेत्रमा आपत्काल घोषणा गरेको हो ।

खडेरीले सुक्खा देखिएको इटालीको पो जलाशयको किनार । यो इटालीको पेनिन्सुलामा रहेको सबैभन्दा ठूलो जलाशयसमेत हो । तस्बिर : द गार्जियन

पो नदी सुख्खा हुनाले उत्पन्न समस्या र पूर्वी अल्पाइन क्षेत्रहरूमा अत्यधिक खडेरीका कारण सरकारको यो घोषणा आएको बताइएको छ । उक्त घोषणालाई मंगलबार मन्त्रिपरिषद्ले स्वीकृत गरेपछि खडेरीसँग जुध्न ३ करोड ६५ लाख युरो छुट्याएको छ।

गहुँ, चामललगायत देशका करिब ४० प्रतिशत खाद्यान्न उत्पादन गर्ने पो नदीको उपत्यकामा झन्डै चार महिनादेखि पानी परेको छैन । जमिन सुख्खा भएकाले लगाएको बालीनाली सबै सुकेर गएको छ । किसानहरुले फलफूल र सागसब्जी लगाउन पाएका छैनन् ।

इटालीको सबैभन्दा लामो पो नदीमा पानी अहिले औसतभन्दा सात मिटर कम भएको आलपाइस दैनिकले उल्लेख गरेको छ । यस वर्ष इटालीमा विगत ३० वर्षको औसत वर्षाको आधा मात्रै भएको सरकारी अनुसन्धान निकाय सेन्टर फर साईन्टिफिक रिसर्च (सीएनआरएस) ले जनाएको छ ।

लगभग आधा इटालियन पशुधन खतरामा

देशको सबैभन्दा ठूलो कृषि संघ, कोल्दिरेट्टीका अनुसार खडेरीले पर्मा हेम उत्पादन हुने पो उपत्यकाका आधा पशुधनलाई पनि खतरामा पारेको छ । पो नदीको पानीले धानको फाँट, खेतबारी र गाईहरूको लागि चर्ने जमिनलाई सिँचाइ गर्छ । यहाँ चरेका गाइको दूध बहुमूल्य पारमिगियानो रेगियानो चिज बनाउन प्रयोग गरिन्छ ।

जलविद्युत् पनि घट्यो

खडेरीको अर्को परिणामस्वरूप जलविद्युत् उत्पादनमा ह्रास आएको छ । उत्तरी इटालीको पहाडी क्षेत्रहरूमा अधिकांश भागका लागि बनाइएका जलविद्युत् परियोजनाहरुले देशको ऊर्जाको लगभग २० प्रतिशत उत्पादन गर्दछ ।

पो रिभर डिस्ट्रिक्ट बेसिन अथोरिटीका सेक्रेटरी-जनरल म्युचियो बेर्सेलीलाई उल्लेख गर्दै युरोन्युजले जनाए अनुसार कृषिका लागि पानी निकासी २० प्रतिशतले कटौती गरिएको र विद्युत उत्पादन गर्न पानीको अभावका कारण जलविद्युत पावर प्लान्ट बन्द गरिएको छ । पो नदी उपत्यका खडेरीमा परेको र पानीका स्रोत सुकेकाले उत्तरका केही सहर र नगरहरूले नागरिकहरूमाथि अत्यधिक पानी प्रयोगमा प्रतिबन्ध लगाएका छन् ।

२५ लाख बासिन्दा भएको सहर बेरोना र विश्वका सात आश्चर्यमध्ये एक पिसाको धरहरा रहेको पिसा सहरसहित करिब सयभन्दा बढी नगरपालिका पानी संरक्षणका उपाय अपनाउन बाध्य भएको अल्पाइसले उल्लेख गरेको छ ।

प्रकाशित : असार २२, २०७९ १०:५२
पूरा पढ्नुहोस्
प्रतिक्रिया
पठाउनुहोस्
×